Thangtlang peng, Tlanglo khuami Pi Van Bawi Hnem nih a cinmi aithing cu Halkha ah zuar dingin Hniang 25|09|2020 zaanlei simuilam 5:00pm ah Hakha an rak phan i aa aithing cu Hakha, market i thilzuarmi hna sinah an zuar.

Halkha An phak a tlai pah cang caah aa aithing cu cuai 80 lawng a zuar manh. A tangmi tun 10 le tan cu a thaizing August 26 ah zuar ṭhan dingin market hmai ah an chiah tak. A tangmi tun 10 te tan cu a cuai in cuai 200 hrawng a si.

A thaizing i aa aithing zuar ṭhan ding a kal cu Hakha Sipin nih nawl na buar tiin Pi Van Bawi Hnem aithing cu an lak i hmunthur rialnak mawṭaw in an rial piak dih. Hi a thil tonmi kong he pehtlai in amah Pi Van Bawi hnem nih a tanglei bantukin thil sining a chim.

Pi Van Bawi Hnem nih a chimmi,“Kanmah hi khuate lei in a rami kan si. Tlanglo khuami kan si. Pawcawmnak caah kan lo ah aithing kan cin i zuar dingin August 25 zaanlei 5:00pm ah Hakha kan phan. Aithing cu market ah kan pek dih manh lo. Tungbing kan hlan i Tungbing zong nih a kan lawi tak. A tlai tuk cang i chikhat te cu hika ah rak um sehlaw zingka ah kan rak lak te lai kan ti i market thilzuar pawl zong nih ee an kan ti.

“A thaizing zingka tuante in kan va kal tikah sipin nu nih pa 4, 5 hrawng a van i ratpi hna i kan aithing cu motor cungah an chiah. Kan dawi hna i kan zaangfah ko uh! upadi kan theih lobia zong a si tiin avoi 1nk ah kan nawl hna. Avoi 2nk ah tangka in dan kan tat ulaw tangka tu kan cawi lai kan ti hna nain an duh lo.

“Avoi 3nk kan va kal ṭhan i kan pu rak tong uh a kan ti. An pu ton kan timh ah kan pu um lo an ti i innka zong an kan onh duh lo, an pu kan tong kho lo. A voi 4nk ah kan aithing cu hnawm rialnak seh in a kan rial piak dih. Kan aithing hi hnawmtam zong a si lo. Kan pawcawmnak le dam lo thlopnak caah kan cinmi a si.

“Kan lungfak tuk. Hi hnu hmailei zongah khuate in a rami paoh cu upadi an theih lo tikah dantu kan tat ko uh law. Hitin cun kan tuahpiak ti hlah uh! tiin zaangfah kan in nawl hna,” tiah Pi Van Bawi Hnem nih cun a chim.

Pi Van Bawi Hnem nih a tonmi kongah Lai hlasakthiam pahnih, Nilen Parmawi le Iang Len Sung an celh ve hrim lo. A tanglei bantukin an lungfahnak le an ngaihchiatnak cu an langhter ve.

Nilen Parmawi: “A cu ngai cu. An ttuan ding rian tu tlamtling in ttuan khawh ttung lo in mipi sin aa-naa (အာဏာ) hman cu an thiam ngai. Hakha khuasa, Hakha phungphai a thei ko mi nih an theih naraw in nawl an ngeih lo va si seh law cu phundang.

“Khuate lei in a ra chom mi , an paw cawm nak caah har le fe in kum khat chung an hlawh mi vial te hrawh piak dih hna cu thluachuah an hmu ngai lai cu ta. Cu pin ah mi dam lo a pasal thlop nak ding tiin a cu za rih lo mi aithing te a rak zuar mi hrim te cu lung kuai in.

Iang Len Sung:“Thinlung a fak i, mitthli a tla ko. Kumkhat chung thi le sa zong reu dihin le chawva tampi dihin ttuan mi, Cikkhat te i lohtlau dih cu ruah ah thinlung a fak khun. စီးပွားရေး caah an timi khi va sisehlaw phundang, harsat ruangle dam lo ruang i sizung umnak le i thlop nak chambau tuk ruangah zeitel a ttha hnem hnga maw tiin tuah mi hlohhlak piak dih cu lung a nuam lo ngai te.

“Nawl buar ruang le theih lo ruang i tuah sual mi ruang ah cun Dan i tat phung siko. Sinan mi paw cawmnak hrawh dih le phundangin chim ah cun mi paw khuai cu a poi bak. Khuate dawtnak thinlung he hmailei cu rian ttuan kho usih law tthatuk hnga.

Pi Van Hnem Bawi fapa pasal zong a dam lo ruangah Halkha sizungah thlopbul a si. Tutan a zuarmi aithing hna hi phuk hmanh an za rih na loin, amah pasal thlopnak ah tiin ruahchannak he a rak zuarmi a si.

A tang i kan chiahmi Democratic Voice of Chin-DVC nih a taarmi video ah thil sining an chimmi tling deuh in zoh khawh a si.

VIDEO