US Covid-19 Update: 04/12/2020: White House coronavirus task force nih April 14 kha a thimi le a zawmi an tam bik caan a si lai tiah an ruahdamh nain US mipi nih social distancing tha tein an zulh caah peak date kha date tampi a thlen caah an thlen ve i, nizan kha a sang bikmi peak date a si. Hmaizarh lei cu a thimi, a zawmi tharmi le a thimi a zor lei an pamh cang lai tiah ruah a si.

Tuchun tiangah US ah a thimi, minung 20304 an phan. Nizan ah a thimi minung 1543 lawng an si cang. A zor deuh cang. A zawmi 525559 an phan. Nizan lawngah a zawmi minung 22382 an i chap nain Friday he epchunh ahcun zetceo renglo a zawmi cazin a zor. Tutiang ah zawtnak a chek cangmi hi 2 million hrawng an si cang. A dam than cangmi 28755 an si. Nizan lawgah a dam thanmi minung 1441 renglo an i chap ve. Athi mi a tam deuh hi minak pawl an si. A pahnihnak ah mirang, a pathumnak ah miphundang an si. A thimi tam deuh hi zawtnak dang a ngeih chihmi mi tam deuh an si.

White House Coroanvirus Task Force nih Friday i Press Conference an tuahnak ah May thla ni 1 thawk in US business pawl kan on than khawh men lai tiah an chim. Asinain President Trump nih zawtnak lei thiamsang hna nih ruahnak pekmi chung in biachahnak ka tuah lai a ti. Mah biachahnak ka tuah dingmi hi ka chan chungah a har bikmi biachahnak a si lai a ti.

Cozah nih Coronavirus bawmhnak a tuahmi, minung pakhat ah $1200 le fa pakhat ah $500 chap dingmi bawmhnak cu nizan ah khan auto deposit in kuat hram an thawk cang. Hmaizarh ahcun mi cheukhat nan bank account ah a lut cang lai tiah zumh a si. Asinain mail in kuat dingmi pawl cu April 24 hnu lawngah kut khawh an si lai tiah an chim. White house coroanavirus task force nih an tuakning ah August thla ni 4 tiang ah khin, a thimi dihlak minung 81,766 kan phan kho tiah an ruahdamh.

Tuan deuh i an tuakning ahcun minung 100000 in 240000 tiang kan thi kho tiah an rak chim. President Trump nih small business pawl bawmhnak caah US$250 billion bawmhnak tuah an duh nain Democrats pawl nih small business bawmhnak he a pehtlai lomi, sizung, sibaw, nurse le food stamp lei ah bawmhnak tam deuh in telh chih an duh caah kap hnih lungtlinnak a ngei kho lo. Republican pawl nih bill kan chuahpi mi small business caah adang tein a thiangmi te tuahmi a si caah a dang bawmhnak he kan cawhmeh kho lo an ti.

Vawleicung ah zawtnak ngeimi tam bik cu le a thimi tam bik cu US kan si cang A zual bikmi khua cu New York a si i, minung ah 8672 an si. Nizan lawngah New York khua ah minung 828 an thi. A ttum lei a pamh cang. Atu lio ahcun sibawi, nurse le healthcare riantuantu pawl cu ralkap nak in bochan deuhmi an si. US mipi himnak caah ral a tumi an si. US rampi chung a zawmi le a thimi, 40% cu New York khuami an si. New York hi vawleicung khualtlawng a tam biknak khua a si caah a zual khunnak a si an ti. Covid-19 ruangah US ah rian ngei lo a sawkmi million 17 renglo an si cang. Credit: Salai Lairamthang