Nihin August 20, zaanlei sml. 4:30 hrawng ah Timit lam lei ah SAC ralhrang le miphun ralkap karlak kahdohnak a chuak tthan, tiah thawngpang kan theih. “Hakha in SAC ralhrang motor pakhat a chuak i ralkap pawl a vung chiah hna rua.

Mah motor cu tunai ah khan Hakha lei ah a lawng in a rak kir tthan cang. Timit lei ah ralhrang motor a kal hnu tlawmpal ah kahdohnak a chuak colh,” tiah minung pakhat nih thil sining a chim. Tukar hrawng Hakha khuachung le Timit lei ah SAC ralhrang le miphun ralkap karlak kahdohnak pehzul in a um.

August 17, zaan sml. 9:30 hrawng ah khan Hakha BOC ah minung 10 chung hrawng kap hnih kahdohnak a rak chuak. Cun, nizan August 19 zinglei sml. 8:30 hrawng zong ah Rual-U thlaan pawng hrawng ah i kahdohnak a chuak. Rual-U thlaan pawng kahdohnak ah SAC ralhrang a tlawm bik minung 5 an thi lai, tiah an zumh.

Cia biadang: CDF-KKG BN (5) simi Gangaw peng Yaw pawl nih anmah Yaw angkii te an thit i, cu ah cun CDF-KKG timi min an benh chih i keimah ca ah an ka kuat— ka sin bel a phan rih lo 😁. Yaw pawl hi an Origin tak cu Kawl Ancestry an si deuh hna. Nain, Chin ramri he aa pehtlainak hmun ah an um tikah, anmah lei zong siseh an rak buai pah ngai, tuanbia ning cun. An min hrim ah ‘Yaw’ timi khi Lai holh in van leh cun ‘icawh’ timi khi a si. Sullam cu Kawl zong nih kanmah Miphun tiah 100% an claim ngammi hna an si lo.

Khuapau dothlennak ah Yaw miphun tampi cu kanmah CDF-KKG tangah BN pakhat dirhmun in a dirmi phu an si. Chin hla an sa, Chin logo (vakok) angkii an i hruk, Chin thantar tangah lu kun in upatnak an pek peng hna. An pawngkam i thazaang a thawngmi ‘Y’ pawl nih hnahnoknak tampi a kan pek ve. Nain, kan Chin mino tampi ‘Y’ lei an um ve tikah an bia kan phih khawh peng ve rih hna.

Biadonghnak bel ka van tuah ti lem lai lo! Ho kan si i, ho kuttang ah rian kan tuan i, ho te pawl dah kan bawmhmi hna an si timi hi kan hngalh ngai a hau. Cu bantuk hmailei ah zeidah a chuahpi lai ti zong hi kan ruah pah cu a hau. (Kawlca in lehpiak lo ding!) Laknak: Za Bawi Thawng