Nihin zinglei sml. 11:00 hrawng ah Timit phak hlan ah SAC ralhrang le kan miphun ralkap karlak kahdohnak a chuak i SAC ralhrang pawl hnu ah an kir tthan, tiah thawngpang kan theih. SAC ralhrang pawl hi Timit lamtthing, Rual-U thlan lei in Timit ah ttum an i tim i, lampi ah kan miphun ralkap nih an kah hna hi a si.

SAC ralhrang nih Hakha, Rungtlang in miakpi in kah an bawmh hna. Asinain, kan miphun ralkap lei in a nunnak a liammi an um lo. SAC ralhrang lei tu in hliamhma a pumi an um len i a thimi zong an um kho. Nihin zaanlei sml. 2:30 hrawng khan kahdohnak a hun dai. Asinain zeitik caan poah ah i kahdohnak hi a chuak tthan khomi a si. Nihin kahdohnak in a kir tthanmi SAC ralhrang pawl hi Hakha khuachung ah an rak lut rih lo, tiah khuami nih an chim. Credit: The Chin Journal

Thawngpang dang: Ye Oo Peng Ah SAC Ralkap Nih Bazar Khan 200 Leng Le Inn 50 Hrawng An Khangh. Sagaing ramṭhen, Ye Oo peng Ṭinṭingyan khua um bazar khan 200 le mizapi inn 50 leng cu SAC ralkap nih an khangh, tiah theih a si. SAC ralkap pawl cu Ye Oo peng nitlaklei Hnawkone khua in July 28 ah an chuak i, July 29 ah Ṭinṭingyan khua cu an khangh.

Bazar khan 200, mizapi inn 50 hrawng a ciam dih, tiah Freedom Revolution Force nih an langhter.
SAC ralkap nih Ṭinṭingyan meithat zung, New Light dawr hmun le Innpatṭan hmun hna cu an khangh, tiah Local Fighter Squad nih an chim.

Cu khua bazar cu pawngkam khua hna nih an rak fuh ngaingai mi bazar pakhat a si, tiah tualchung mi hna nih an chim. SAC ralkap pawl cu Ye Oo le a pawngkam Depeyin hmunram ah rallam an sial i, inn le lo an hrawhmi le an khanghmi a tam, tiah tualchung mi hna nih an chm.