Nihin August 15 zinglei Hakha le Thantlang karlak Timit kiangkap kahdohnak ah SAC ralhrang a thimi le hliamhma a pumi an tam i, kan miphun ralkap pawl nih an meithal cheukhat zong an lakpiak khawh hna, tiah thawngpang kan theih.

Nihin zinglei kahdohnak ah hin kan miphun ralkap lei zong in hliamhma a pumi cheukhat zong an um ve. An dam zau lai tiah theih a si. SAC ralhrang lei belte in ralhrang minung 10 in 15 karlak cu kan miphun ralkap nih an thah khawh hna. An meithal Machingun telh in mortar bomb pahnih le a dang meithal pakhat zong kan Chin miphun ralkap nih an lakpiak khawh chap hna.

August 11 le 13 karlak i Timit hrawnghrang i kahdohnak zong ah khan kan miphun ralkap lei nih SAC ralhrang meithal kuan le tangka le an phone tiang in an lakpiak khawh hna. Atulio cu Hakha-Thantlang karlak Timit hrawnghrawng le Hakha-Gangaw lam lei ah i kahdohnak a um ca ah khualtlawn i ranrin ding in theihternak kan in tuah hna. Credit: The Chin Journal

Thawngpang dang: August zarh hnihnak, Karenni ramkulh chung kahdohnak ah SAC ralkap 19 an thi i, Karenni ralkap phufonh lei in ralkap pakhat nunnak a liam ve, tiah KNDF nih cathanh an chuah. August 8 le August 9 ah Shiataw pengchung SAC ralkap le KA, KNDF phufonh kar cu voi li tiang kahdohnak a chuak, cu kahdohnak ah cun SAC ralkap lei 8 an thi, tiah KNDF nih an thanh. Hpruso peng ah SAC ralkap khah-lah-yiah 531 le Karenni hriamtlai phufonh kar cu Aug 9 ah, suimilam 3 tluk hrawng kahdohnak a chuak i, cu kahdohnak ah cun Karenni ralkap lei in ralkap pakhat a nunnak liam, tiah theih a si.

August 9 ṭhiam ah, Demoso peng Sanpiah meng 6 khua ah SAC ralkap le KNDF battalion 9 kar kahdohnak a chuak i, SAC ralkap 5 an thi. Cu ni zaanlei ah cun Demoso palik sakhan cu KNDF nih luhhnawh in an kah ṭhan hna i, SAC ralkap lei a thimi an um, tiah an thanh. August 12 ah Ruphaekhu sang Baptist Biakinn pawng ah kahdohnak a chuak i, SAC ralkap pakhat a thi, tiah theih a si.

SAC ralkap hna nih kahdohnak a chuahnak khua pawng um mi khuami hna cu ralphaw ah an tlaih hna. Cupinah Loilinlay peng, Dawpapah khua cu SAC ralkap nih vanlei in an kah caah tualchung mi pakhat a nunnak a liam i, 2 nih hliamhma an tuar, tiah KNDF nih cathanh an chuah.