Hakha Khuahlun sang ah aho si hngalh lo mi nih motor in tiva chung ah ek an thlet tiah sangmi cheukhat sin in November 19 ah kan theih. Hi an hlonh mi kong he pehtlai in Sangmi Pi Ci Pen nih, “Hi bantuk ek an kan thlethnawh mi hi cu kan duh bak lo. Tuzing ti ser ah ka kal. Zei haw dah a thu ka ti, ka hun zoh i ek an thlet mi a si. Thaal a si i ti zong nih a fenh kho lo. Ka rawlei kaa zong a thaw ti lo,” tiah The Hakha Times ah a chim.

Ek an thlet mi hi lampi zong ah an thlautak dih. I chawhleh tik zong ah a haw a nam. Lampi ah tamtuk an thlawt pah rih. Hi an thletnak hi zaanhnih chung hrawng a si cang. A si khawh ahcun hibantuk lam le inn he aa naihnak i ek thlet hnawh hi cu kan tuahpiak ti hna hlah seh ti kan duh,” tiah Khuahlun sangmi Pi Ngun Hlei nih The Hakha Times ah a chim ve.

Hi an thlet hi cu kan inn he aa hlat ca ah an thlet ka thei lo. Keimah nih thletnak nawl ka pek mi an si lo. Hi a thletu zong hi kan theih hna ahcun dantat an hau,” tiah Khuabawi Pu Far Kam nih The Hakha Times ah a chim. Hakha Khuahlun sang khuavelnak lam cheukhat ah hin aho ti hngalh lo mi hna nih hmunthur le a dangdang zong an hlonh peng tiah kan theih. Ref: The Hakha Times

Relchih: Kan theih bantukin US President thimnak vote relnak cu a buai kho taktak khi si. Tuchun ah khan Donald Trump- legal team hruaitu hna nih press conference an ngei i, zarhhnih chung vote a dik lomi kongah relfai tein kan khawmhsuat dih cang. Court ah teinak kan hmuh hrim lai timi zumhnak kan ngei tiah an chim.

November 3 thimnak vote an relmi ah khan Donald Trump nih tamtuk in Biden hi a tei tikah ramkhel lei thiamsaang pawl tiangin an khuaruahar dih. Mah lawng si loin amah Trump zong nih teinak ka hmuh cang tiin a lawmhnak cu a langhter ve. Asinain a hnu ah vote tthan an ti khan result aa thlengnawng dih. Mah ruangah khan dan hmangin a dik lomi pholangh dingin Trump-a legal team hna nih court ah chuah pi an timhnak cu si.

US constitution nih fiang tein a chim mi cu “State Legislature thimnak ahhin phunglam an siam lai” ti hi a si. Mah hi State kip ah phunglam buar in Nov 3 zan suimilam 8 (deadline) lonh hnu ah vote lak tthan mi tamtuk a umnak kong cu Trump-a legal team hna nih an chim hi si. Cu pin ah vote tamtuk relning cang cu phungkalh in Nov 3 zan suimilam 8 a luan hnu relmi he vote hi rel dih ding an ti.

Hi kongah Court nih phunglam ning tein lai a rel ahcun Joe Biden hi fiang tukin a sung ding a si. Asinain Trump caah thinphang ngai pakhat cu “Supreme Court ah biaceihtu Chief Justice John Roberts nih hin Obama chan lio ah khan politic kongah a fiangtuk mi ttenkhat ah Constitution nih a chim mi vialte cu amah nih a thah dih.” Atu ahhin Supreme Court ah ceihkhan si sehlaw liberal pawl nih cun Trump an huat ruangah President pehter tthan dingin biachahnak an siam lai lo. A ruang cu conservative lei hi tam deuh hmanh khi si sehlaw Chief Justice bak nih phunglam zulh loin biachahnak a tuah lengmang tikah mah hi a buainak bik le biahalnak nganpi a um mi si.

A buaithlak ngaimi pakhat cu Trump a huatu pawl nih nawlngaihnak an ngaih ning hi phunglam lonh le zeirel lo ngaiin rian an kalpi tawn. sinain Trump hi an doh sual khawh men. A cunglei langhtermi tthenkhat khi Court ah hmalak an i timhmi tlangpi a si. Hi lawng si loin a dang timhmi zong an ngei rih.