Nihin Hakha Khuapi Dirhmun Cu Ngaihchia Bak Si. Hi Ti Ning Cun Zapi Caah Harnak A Chuak Kho
Chin ramkulh, Hakha Khuapi ah datsi 92 thawl khat(1 liter) ah kyats 4000 a phan i, gallon khat ah Ks. 15,000 a phan. Tank(ṭengki) pakhat ah Ks. 750,000 a phan i, Datsi 95 cu thawl khat ah 5,000 tiang a kai. Hakha datsi a zuarmi pakhat nih, “August 13 tiang ah khan datsi 92 gallon khat ah Ks. 13,000 a si nain, nihin August 15 ah gallon Ks. 15,000 a phan cang.
A luancia zarh ah Tank pakhat ah Ks. 600,000 a si i, atu cu Ks. 750,000 a phan cang,” tiah The Chin Post ah a chim. Nihin August 15 thawk in tuzarh chung ah datsi a dih kho men, kawl lei in a rak phanh ti lo ahcun Hakha ah datsi a dih cang lai i, zuar awk zong a um ti lai lo. Atu a taangmi hi nihin ahcun a dih cang lai, tiah a chim chap.
Cheu khat dawr ahcun minung pakhat nih tampi cawk an duh ti lo, cycle pakhat ah aa tlum zat lawng an rawn piak hna. Kawl lei in datsi a rak phanh ti lo caah a har ngai cang, tiah a chim. Kawl lei ah cun datsi cawk ding in mi tampi an i tlar lulh cio. Cheukhat khua ah cun datsi nih a dihtak hna caah an cycle cu a nam in an nam, tiah theih a si. Credit: The Chin Post
Thawngpang dang: Chinmi pa pakhat cu ralkap nih an tlaih i sing 10 in an hlam lo ruangah an thah. Sagsing ramṭhen, India-Myanmar ramri, Tamu ah Chin miphun a simi Ko Kim Pu cu August 13 ah SAC ralkap nih an tlaih i a chungkhar hna kha sing 10 in rak hlam uh tiah an ti hna. A chungkhar pawl tangka an har tuk lio a si caah an hlam kho zokzok lo i ralkap nih an thah tiah theih aKo Kim Pu ruak cu sizung ah an rak lak ter hna i August 14 ah an vuai tiah Ko Kim Pu hawipa nih Khit Thit ah a chim.
“An thahmi hi ka hawipa kum 33 a simi Kim Pu a si. August 13 ah ralkap nih an tlaih. Moeye lei ah thilri cawk dingin a kal lioah an tlaih. Ralkap nih a chungkhar kha sing 10 in an hlamter hna. Tangka an ngei lo i an chimmi nicaan ah an hlam khawh lo caah an thah. Ko Kim Pu nih a nu, a nupi le a fapa pakhat a tantak hna” tiah a chim.
Ko Kim Pu hi thil a zuarmi mi sawhsawh a si. India-Myanmar ramri, Tamu ah Pyusawhtee le ralkap pawl an hrang tuk. Tangka a ngeimi hna inn kha meithal in an tlerh hna i an tangka an chuh hna tiah ” Ko Kim Pu hawipa nih a chim.