Nizaan ah Hakha a ummi Thang Zang khuami Hakha ummi tlangvaal Ngun Dawt cu Hakha Mucu sangah a ummi Tiphul khuami tlangvaal Rual Bik Thawng nih a velh ti thawng kan theih. Cu lawng hlah a pawngkam i a ummi ahawile nih Video an thlak i, anmah hawile tete video an i kuatnak ah facebook tiangah a phan i mi tampi nih an hmuh.

A hmuhtu vialte an thinhung cio i an lungfak an ngaihchia cio. Cu chinchap lo ah an vuakmi pa Ngun Dawt hi ngakṭah a si hleiah amah hi mi dam lo a si tiah kan theih fawn. Cun, laitlang leiah a ummi a chungkhat hna zongah Hakha ah an kai hna i a herhningin upadi ningin kan tawlrel lai an ti ve cang.

Tlangvaal Ngun Dawt hi ngakṭah a si bang, amah a zohkhenhtu a umnak Pi Zing Hlem nih hitihin a chim ve,“ A voikhat cu an dihlak/an zah tein an velh i video an thlak manh lo. A thi a chuakmi an ṭawlter i cu hnuah video hi a voihnihnak an velh lio an thlakmi a si. Tlaih cu chim lo a bawmmi lawnghte an si minung pa 7 an si,” tiah a chim.

Australia hrambunh thawngzamhphu Cbnetwork nih an zohkhenhtu Pi Zing Hlem thil sining an halmi ah a chimmi cu,“ Pate hi ka hring lo nain ka kawmchung um a si. Ngakṭah a si. A fel i ka dawt. Pa le pa cu kutke tlamtlin ko ahcun i velh phung ah ruah a si. Asinain, ka ngaih a chiatmi cu siiuzngah i a kut aa put i mizaw a siko mi hitluk in a kan tuahto piak hi ka duh bak lo. Ramdang lei a nu le pa unau zong nih an hmuh. Thantlang lei a nu le pa unau zong nih an hmuh i an rak ra lio. Hi kongah upadi ningin kan i ceih hau a te lai,” tiah Cbnetwork sinah a chim.

Thil sining kan dothlat cuahmah lio a si i, aherhning thawngzamh khawh kan rak izuam ṭhan lai. A chungkhar neihniam a umnak hna zong pehtlai kan zuam cuahmah liopi a si. An velhmi tlangvaal Ngun Dawt chawnhbiak aduhmi nih 09268199803 hi ka hin pehtlaih khawh a si lai. VIDEO timi hmehpiak law an vuaknak zoh khawh a si.