Velh a tongmi kan naupa Ngun Dawt konglam cu aho cio paoh nih kan theih dih cang lai tiah a ka ruah. Tutan ah langhter ṭhan kan von duhmi cu, Pa Ngun Dawt hi zeiti set in dah an vuakning a si timi le atu a dirhmun kong he petlai in amah a zohkhenhtu Pi Zing Hlem nih a chimmi kan von langhter ṭhan lai.

Pi Zing Hlem nihcun,“Kan fapa Ngun Dawt cu atu hi tang 9 a kai lio a si i Pathian dawtnak thawngin tang 9 te zong a awng. A velh hna khua min hi pathum hi Tiphul khuami an si i, pakhat hi Ramthlo a si i, pakhattu hi Thantlang a si i a khua fiang tein kan thei kho lo. Anmah hi unau rual pathum an si i Ngun Dawt a pa hi Ngun Dawt a chuah thlakhatnak ah Malaysia a kal i thlakhat a liam taak hna. A nu hi mi ngandam lo a si caah a pa thih tlawmpal ah pahnih hi cu ngakṭah (sianginn) ah a chiah hna. Ngun Dawt tu cu a ngakchiat tuk rih caah chiah awk a ṭha lo i cuticun an um i a nu a thih hnuah an inn pawng nu nih a zohkhenh.

“A chungle khat nih hin atu bantukin vanchiatnak a ton hnu lawngah i Facebook i an taar hnu lawngah an hlam. A merte zong a zaang i rian fial zong a fawi i a dawt zong ka dawt. Ka sik hmanh ah ka fale nih si hlah tiah an ka ti tawn. Ka sikmi hi a mah caah peih a si ko cu tiah ka fale zong cu ka hei ti tawn hna. Kan umnak hi Halkha Pyitawda YMC sang ah a ummi kan si. Kan fapa Ngun Dawt zong Pathian nih a zaangfah i a tu hi sizung zong in kan chuak cang. Cun, ka kip a ummi Laimi nih nan lungre na kan theihpi, kan tuarpi ciomi cungah lunglawmhnak tampi ka ngei,” tiah Pi Zing Hlem nih Chin World News Evening sinah a chim.

A zohkhenhtu Hniarlawn khuami Pi Zing Hlem nih cun hitihin a chim,“ Kan fapa Ngun Dawt cu sizung in a chuak rih lo, sizungah a um liopi a si ko rih. Hi tibantukin Ngun Dawt an velhnak video ka hmuh tikah, anmah chung (a veltu chungkhar) pawl cu Laimi le Laimi kan si, nulepa zong a ngei lo ngakṭah buangro te dawkaw a si cu zeiruagah Pate hitihin nan velh kan ngaihchia tuk hung kan tong uh kan ti hna zongah a kan tong lo.

“Nizaan tu cu an hung ra nain zeizong vialte cu a dih/cang cangmi a si ko. Chungkhar hna cu tangka ting 5 le vok sum (5) an vun i put nain vok tu a sui kan hmu lo i ting 5 cu an kan pek. Um rih ko seh, zeicahtiah hi thil hi keimah lawng ka si lo i, a nute, a pu, a u le zong an um ve tikah, keimah lawng nih zeihmanh biakhiahnak ka tuah kho lai loh. Ingaihthiam a si zongah kei cu zeihmanh kan laa (hal) hna lai loh. Keimah nawl a si loh. Hi thil a sawsawh menmen a si lo tikah, Ngun Dawt zong hi ngandam seh, ṭha tein a dammi cu va sisehlaw, pa le pa cu zuu dinnak va velh sual cu a si tawnmi si ko.

“Atu cu sizung a kalnak in a kir leiah ahawile an si tikah, inn ah ka thlah ve ulaw ke in ka kal i ka baa tuk a ti hna i ahawile nih cun aww si ko, Cycle ngeitupa kan chimh lai an ti pumpulh chuihnak hmun (bawlung chuihnak kun) ah kalpi riangmang i hi tluk in an velhmi cu kan lung a fak tuk. A phone zong ka chawnh lengmang nain an hrawhpiak caah phone a tlai kho lo. Ka ngaih a chia ngaingai ko. A kut zong a cawlcang kho lo angki zong aihruk-aih kho lo, kanmah nih kan hruk chawm, hliamham a faah tukah a kut zong a tum kho ti loh.

“Hi bantukin sizung i a kal lio an velhmi cu a ka ngaih a chia tuk hringhran. A kutter khi va ṭha (dam) sehlaw pa le pa cu ivelh phung zong a si ko, thichuak tiang zongin ivelh phung a si ko. Asinain sizungah an kal i chun sml 12:00 Pm ah ka rawl ṭamtuk a ti i kanmah zong inn kan sa i kan i manh lo hleiah cycle cit zong cu kan thiam loh. Ngun Dawt a thlahtu le dawngtu hi sizungah rianṭuan vemi a si i keimah ka fa ahniang bik a si. Cuti cun a thlah tawn. Sizung i rianṭuan kan ti cu, sml 12 hlanah aimanh ti lo, cu tikah Ngun Dawt nih cun a ṭintaak. Cycle citnak a kut ai khawn caah nifatin te akut hma cu an tawlpiak.

“Sizungah um ding zong a si ko nain, inn kan sak liopi a si tikah chun ah a umpi khotu ding kan um loh. Zaan ah kan in riahpi lai. Chun ah cun na ule sinah na um lai i rawl ei ding zong kan i chanh lai, zaan ah kan in riahpi ko lai kan ti nain a duh lo caah a si kun ahcun nifatin te alaangtu in ra ko ne uh tiah sibawite nih an kan ti. Zarhpini ah atu bantukin an velh hi a si. Nidang ahcun cycle tein thlah-dawn lengmang a si ko nain, cu ni cu amah nih ka rawlṭam tuk a ti i cycle a hngah khawh lo ruangah amah lawngin a ṭin i sizung lampial thlang pumpululh chuihnak hmun an phan hlanah, ahawile cu a hmuh hna i, dir rih hmanh u, zaangfahnak tein ka thlahta uh ka ti hna i zuuthawl an i put pah tiah Ngun Dawt nih cun a chim i, aw si ko cycle ngeitu hna kan chimta lai rak kai ko a ka ti i pumpululh chuihnak zohnak hmun pakhat ah an kalpi i atu bantukin an velh hi a si.

“Video nan hmuhmi kha voihnihnak an velh lioah an rak  laakmi a si. A voikhatnak ahcun an zahte in an ka vuak i ka hnarthi a chuak tuk caah ruah sur liopi a si i Joseph nih a ka zulh i luti a luangmi (ruahti/tilu) in an ka hmai an ka phiahter tiah Ngun Dawt nih cun a kan chimh i, ka hmai kai phiah hnuah ṭhu an ka ti i an ka vuak ṭhan (Video chung kan hmuhmi kha) tiah a chim. Cun, sizung in a chuak kho ding a si rih loh. A mitchungah a thi an hrawlmi a um pah i sibawipa Dr. Cung Cung nih Kanu hi ṭha tein dathmanzaih (altisound) tuah hihi a thluak lei hna a kal ahcuna thluak a rawk khomi zong a si ṭih a nun pah ko tiah a kan ti.

“A video kan hmuh bantuk khan a lu hna an chuih faak tukin an vuak a lamh chih tikah a hliamhma a faak ngaiin ṭha tein nan zohkhenh hau ko lai tiah a kan ti. Thluaklei dathman zaihnak (Altisound) hi cu Halkha ahcun a ṭhami um ngaingai loh, Yangon ah Japan lei ta pakhatte a um i cu zongah cu zapi zaraan nih cun piah khawh a si lo. Voikhat zeih ah Ting 400000MMk a dih ding a si an ti. Coronavirus ruangah Yangoon lei kal zong a tu lio cu a har ngaingai. Palik pawl nih zeih ko uh ngakṭah a si kan ti hna lai i a man hlah uh kan in ti piak hna lai ti zong a kan ti. Sii man zong kan pek hna ko nain a kan hlang duh lo. Cucu kan cawlcanghning cu a si. Thla a kan campiaktu nan dihlak cungah kan ilawm tuk hringhran,” tiah Ngun Dawt zohkhenhtu Pi Zing Hlem nih Chin World News Evening sinah a chim.

Admin hmurka: Hi thawngpang kan ṭialmi hi ahohmanh laak (copy & paste) kan siang loh.