Mizoram in a rak kirmi Pu Zo Bawi Le Salai Isacc Khen nih fak tuk in an hlen hna. An lungfak ngaingai. An hlenmi hna hi a minung in 1300 hrawng an si tiah kan theih.

“Kum 2016 ah khan Chin ramkulh hlutraw Speaker a simi Pu Zo Bawi nih Mizoram ah a ummi Laimi vialte rak kir uhlaw Hakha ah inn hmun kan in pek hna lai tiah Pu Zo Bawi nih a chimmi TV zong in kan zoh. Cun internet zongah tampi kan hmuh. Hi io hi Isacc khen zong Sipin vuanci a rak tuan lio kha a si. Isacc khen le Pu Zo Bawi hi kan ton lengmang hna. Um rih uh an kan ti lengmang tiah, a chim.

“Cun, Lawngtlai ah Hakha lei committee an ra i Lawngtlai ahcun tonnak an ngei. Lawngtlai ah committee zong ser a si ve. Aizawl zong ah relief committee zong ser a si. Kum 2016 ah khan Mizoram in Hakha ahcun kir kan rak thawk.

“Hakha kan phak in a kirmi zat le minung min zong Pu Zo Bawi le Isacc khen sinah kan pek dih. Sinain a tu tiang Hakha ah inn hmun pek kan tong lo. Inn hmun pek cu chim loin zeidah nan lawh tiah chawnh le lenkai zong kan tong lo. Hakha ah a rak kirmi hi minung 1300 hrawng kan si. Inn 20 cu hmatpungtin zong tuah piak khawh an si lo.

“A tu tiang zeirello kan ton tikah kan lung a fak i kan ngaih a chia. Mahhi kong hi hluttaw zong ah rak ceih balmi a si lo. Pu Zo Bawi nih a kan rak dehhlen bakmi a si. A seihkuyin a rak kan chimh sawhsawh a rak si ko hih.

“Cuticun Mizoram cozah lungtlinnak tein chuahsemnak ram ah a kirmi Chinmi hna cu inn hmun zong ngei lo in an vakvai. Hakha ah inn hlang in an um hna. Hakha ah inn hlan a celh ti lomi cu an pipu khua a rak simi khuate ah minung tampi an kir than cang hna” tiah Mizoram in Hakha ah a rak kirmi Upa Henrry nih a chim.

“Kan hnu te ah khan Dr. Hmuh Thang sinah mahhi Mizoram in Hakha ah a rak kirmi inn hmun pek kong ah hluttaw meeting ah kan chim piak tiah ka fial hna i tulio cu thimnak lai tuk a si caah ceih awk a ṭha rih lo. Pu Zo Bawi he nai ah kan i tong i ka chimh. Tukum thimnak a van dih bak cun papek nan si cang lai. Inn hmun kan in pek cang hna lai tiah a ka ti than hoi.

“Tulio ah Hakha peng NLD palai hna nih vote kawlnak ah an hman. Vote nan nan pek i kan tlin ahcun ramleng in Laitlang ah a rak kirmi nan chung le zong Hakha ah inn hmun kan pek hna lai tiah an chim. Hihi a hohmanh nih rak zum hna hlah uh. An lih an hrokhrawl a si. Mizoram in minung 1300 tluk a rak kirmi hmanh a tu tiang inn hmun an kan pe duh lo,” tiah Pu Hennry nih cun a chim.

Ramdang ah a um cangmi an ram ah an kir than ahcun ramchung cozah nih ṭha tein rak don i an umnak ding hmun le hma zong pek a si tawn. Refugee zong anmah ram ah an kir ahcun an himnak ding le an umnak ding inn le lo cozah nih ṭha tein tawlrel piak a si tawn. Sinain tutan ah Mizoram ah a ummi Laimi kan unau hna cu Chinram an hung kir tikah cozah nih zeihmanh tawlrel an duh hna lo.

Pu Zo Bawi nih le rak kir uh, Hakha ah inn hmun kan in pek hna lai tiah TV tiang ah a chim fawn. Chin cozah theih loin Pu Zo Bawi nih Mizoram um kan unau minung 1300 tluk a hlan hna, a vaivonh hna ti khawh a si. Cu lawng hmanh a si rih lo, tukum 2020 thimnak ah Hakha peng NLD palai zeimawzat nih inn hmun kan in pek hna lai tiah vote kawlnak ah an hman fawn rih.

Laitlang cu Democracy zong a su ve cang i kan chuahsemnak ram te ah um kan duh ve cang, kir can a za cang tiin Hakha ah a rak kirmi Mizoram kan unau hna i i tukum 2020 in cozah a tlai dingmi ramkulh cozah nihcun Fak piin rak ruah piak cang hna uh