Admin|| 05 Biangreithlep|03|2020||US Covid-19 Update: 05/03/2020. Tuchun tiangah US ah a thimi, minung 67444 an si. Nzan ah minung 1668 an thi. A zawmi 1160774 an phan. Nizan lawngah a zawmi, 29282 an i chap. White House Task Force hna nih April 14 an tuakning ahcun minung 74073 an thi kho tiah an tuak. Tutiang ah zawtnak a chek cangmi mi 6 milion renglo an si cang. Minute 5 lawng a raumi, Virus icheknak swab in nifatin minung a sing in an chek khawh cang hna. Antibody testnak zong New York ah an hman cang.

New York khua lawngah a thimi minung 24368 an si. Nizan lanwgah minung 299 an thi. New York khua pakhat lawng i a thimi minung hi US ram pumpi a thimi 35% tluk a si. US um Laimi zong a zawmi tam ngai dawh kan si. Indianapolis lawngah a tlawmlei in minung 40 cu zawt dawh an si. State dang zongah a zawmi an um len. A zawmi nih an chim duh lo caah azaw mi zet theih a har ngai. Washington D.C Area um, Chin miphun chung in Tedim lei kan unau minung 20 an zaw ve. Hakha lei a zawmi kan hngal rih hna lo.

Friday ah Gilead CEO Daniel O’Day cu White House ah a kal i President Donald Trump le Vice President Mike Pence a va ton hna, FDA nih Remdesivir si cu Covid-19 mizaw thopnak caah Gilead nih zetindah an serchuah timi kong le hmailei ah zetin phawtzamhnak an tawlrel lai timi kong ceihhmainak an ngei. US ahcun zeibantuk si an serchuah mi poah FDA nih an test dih hnu i an cohlan hnu lawngah chuah khawh le zuar khawh a si.

National Institute of Allergy and Infectious Diseases Director, Dr.Fauci nih nizan ah Gilead Scientist hna nih an sermi remdesivir si a hmangmi hna cu 30% an dam a rang deuh tiah tuchun ah white house ah a chim. National Institutes of Health hospital ah coronavirus in a zawmi minung 397 cu phu hnih ah an then hna i, an test hna i, phu khat cu ni 5 chungah an dam i, adang phu khat cu 10 chungah an dam. Cucaah emergency caah cun hman khawh colh a si lai tiah a zumhnak nizan ah a chim. A chim bantuk tein FDA zong nih man ding in tuchun ah an cohlan colh ve.

Gilead nih testnak an tuahmi hna chung in 50% cu zarh hnih chungah an dam dih tiah an chim. A zawmi chung in 65.5 cu ni 5 chungah an dam i, 53.8 cu zarh hnih chungah an dam ti a si. Coronavirus in a zawmi hna damnak caah Remdesivir si a ser hmasa bik cu US kan si. September thla chungah hin US si company a simi, Johnson & Johnson Vaccine an serchuah lai tiah zumhnak a um. Credit: Salai Lairamthang

Admin hmurka: Hi cabia hi a ṭialtu hi Salai Lairamthang a si i amah nih tlangtaar ngaingai a chiah lo caah cathlahtu lei nih kanmah nih a rem kan ti ning in kan rak taar chinmi a si. Tlangtaar hi kanmah nih kan tuahchinmi a si, Salai Lairamthang nih a tuahmi a si lo.