Ngaihchia ngaingai a si ko. Ruah ah thinlung mitthli an luang. Chin State chung ah a ummi Paletwa kan unau cheukhat minung 3700 hrawng cu zingzan eidin ding ti le rawl an ngei ti loh. Rianrang in bawmh kan herh hringhren ko tiah a hmun rian ttuantu hna nih an chim. Hi bantuk in eidin ding ti le rawl ngeilo in an umnak a ruang hi zeidang ruang ah silo in Arakan Army pawl le Tarmadaw rawlkaap pawl tuk-kah nak ruang ah a si. Rianrang in bawmh an herh ko tiah Relief and Rehabilitation Committee for Chin IDPs hna nih an thanh.

Chin State Paletwa ah hin ral an i tuk lawng silo in hriamtlaiphu pahnih hna nih hin kan hnu lei February thladongh zawrh thok khan facang zong luhpi an sianh ti hna loh. An meithal kuan le an bomb in an thih pin ah a tu cu eidin ding ti le rawllo in thih an i tim tthan cang. RRCCI hna nih an nizan April 18 ah an chimmi cu hi hmun ah hin minung cio pei an si cu ti in an herhmi thilri va chanh zong hi a har taktak tiah an chim.

Khumi Media Group nih an chimning in man peklo in rian ttuantu pawl hna ca zong ah a fawi hrimhrim loh. An nun himnak ding kong zong ah thinphang ngaingai a si tiah an chim. Cu bantuk in man peklo in rian ttuantu (volunteer) minung pakhat nih RRCCI sin ah a chimmi cu chunzanhlan in dide ngaih peng a hau. Thinthi in i hngilh ngam zong a si lo. Hi hmun ah hin a ho hmanh van bochanding kan ngei lo tiah a chim. Ref: Mizz