Ngaihchia Ko Mu. Amah lei hawih in khua cuanh ahcun

Hringtu nu nih a thih taakmi, pa pakhat lungrawk ngai in a rak um. Riantuan zong a zuam ti lo, tidin le raw ei hmanh lung chuak lo tiang in, hringtu a nu zun a rak tuar. Hawikom, unau le innpa chakthlang vialte nih, heh lawh, tiah an rak hnemh len sihmanhsehlaw a ngaihchiat le lungfah a zual chin lehlam.

Voikhat cu, a lung len celh lo ah hringtu a nu vuinak thlan-hmun lei ah a kal. Thlan cu pakhat hnu pakhat in a zoh cio hna, aa chok, aa let. Thlan-hmun a kil lei deuh ah khin, thlan tharte pakhat a hun hmuh. Cu thlan cung ah aa tialmi ca nih a nu thihnak kong i a ruahnak fakpi in a thlen. Cu thlan te cu, fa hring kho lomi nuva hna nih, an bei a dongh cikcek hnu ah, an hrinmi fanu duhnung te thlan a rak si ai.

Fa a ngei kho lomi nuva nih an tarlei ah ngeihmi fanu cu si kaw, an dawt tuk hringhran ve. Mithmai zoh hmang lomi thihnak nih ruahlo pi in, kum 7 a si ah a phanh ve! Mi nih, zeitindah an ngaihchiat le lungfah an tuar khawh lai? Zeitindah an um lai? Beidong in anmah le mah nunnak hmanh an i la ko lai maw? tiah an ruah hna.

Nain cu hna nupa nihcun tihi hin an fanu thlanlung cung ah ca an ttial: “Kum 7 chung fanu duhnungte a kan hlantu Pathian na cung ah kan i lawm” tiah an ti. An nih nihcun, “kum 7 te lawng maw?” an ti lo. “kum 7 chungpi” tiah an ti i tuante a thih taak hna ruang ah lungfah loin saupi a hlanh hna ruangtu ah Pathian an thangthat!

Australia ah khuasa cangmi kan farnu Pi Tha Iang nih zahan zan ah a liam taak. A thihning a fak hringhran. Kum 27 a si. Fapa hniang deuh cu thla 2 le ni 20 te lawng a si rih. An pa hi dinh caan ngei loin riantuanmi a si fawn! Khuaci kan mui ko. Vawlei lei hawih in khuaruah ahcun, Pathian sin hmanh ah lungfah le thinhun hnawh phu a si.

Ziah, na thihter? Ziah, a fa semte hi na daw ve lo maw? Ziah?, ziah? tiah dong loin Pathian biahal len awk khi a si. Sihmanhsehlaw nunnak thaw a kan petu Pathian lei hawih in khuaruah ahcun, a pasal caah “Bawipa, kum 27 chung nupi duhnung tuk na ka hlanh caah kaa lawm” ti khawh nak lam a um ve ko.

A nu le pa caah, “Bawipa, kum 27 chungpi fanu ttha tuk na kan hlanh kan caah kan i lawm” tinak lam a um ve ko. A ule vialte caah “Bawipa, kum 27 chung nau ttha tuk na kan hlanh caah kan i lawm tuk” ti khawh zong a si ve ko dahkaw. A fak bikmi thihnak hmai zongah a hmu thiamtu hna ca ahcun, ‘Bawipa tthatnak’ cu hmuh awk a um zungzal ko; amah lei hawih in khua cuanh ahcun.

Credit: Pastor Hrambik Lian