SAC Ralkap Nih Sinin(ဆင်အင်း) Khua An Khangh Caah Inn 1,200 Leng A Ciam. Sagaing ramṭhen, Shwebo peng Sinin khua ah umhmun a khuarmi SAC ralkap nih, Sinin khua cu atu le atu an khangh caah inn 1,200 leng a ciam cang, tiah theih a si. 2022 November thawk in 2023 January thla tiang ah Shwebo peng Sinin khua palik sakhan ah umhmun a khuarmi SAC ralkap nih Sinin khua an khangh caah inn 1,200 leng a ciam, tiah theih a si.

Atu zong SAC ralkap cu palik sakhan ah umhmun an khuar peng rih caah khuami hna cu ramlak ah ralhrial in an zamnak thla thum leng a si cang. Sinin khua cu inn 1,500 leng a umnak khua ngan pakhat a si, tiah theih a si. SAC nih February ni 2 ah Sagaing ramṭhen peng 11 ah martial law an chuahmi ah, Shwebo peng cu ralkap uknak martial law an chuah lo nain Shwebo peng ah SAC ralkap nih rallam an sial i khuate tam tuk an khangh hna pin ah khuami zong an thah hna, tiah theih a si. Credit: The Chin Post

Thawngpang dang: Myaing, Yetarshi Le Okhpu Kahdohnak Ah SAC Ralkap 4 Le Pyusawhti 1 An Thi. Magway ramṭhen, Myaing peng Kaingtawma palik sakhan in a kirmi SAC ralkap pawl cu, February ni 7 zanlei sml 2:00PM hrawng ah Kwekone le Wetpauk khua kar ah bomb in kan puahhnawh hna caah SAC ralkap 2 an thi i, 3 hliamhma fak ngai an pu, tiah Lieutenant La Kyia nih a chim.

Cu kahdohnak ah Myaing PDF Battalion 1, Barmahti Force, Zarmani Force le Hnin Kwe PDF hna i bawm in an kah hna, tiah theih a si. Cu ṭhiamṭhiam in Bago ramṭhen, Yetarshi peng ah rallam a sialmi SAC ralkap pawl cu February ni 6 zan sml 7:00PM hrawng ah Sipaing khua lei an kal lioah bomb in kan puahhnawh hna i SAC ralkap 2 an thi, 2 hliamhma fak ngai an pu, tiah Bago Region PDF in ṭuanvo ngeitu nih a chim.

Cu kahdohnak ah Taungngu PDF Battalion 3501, Companny 4 nih Nan Htaik Aung min in kahdohnak an tuahmi a si. Pehtlai in kahdohnak a chuak kho ṭhanmi a si caah mizapi umkal i ralrin ding in Bago Region PDF nih theihternak an tuah, tiah theih a si. Cu pin ah Bago ramṭhen, Tharyarwaddy pengkomh Okhpu(အုတ်ဖို) peng Kyuaiphyuma(ကျွဲဖြူမ) khuami pyusawhti hruaitu Than Chaung cu February ni 7 zanlei sml 2:30PM ah thah a tong, tiah Bago Region PDF in ṭuanvo ngeitu nih a chim.

SAC kuttang pyusawhti Than Chaung cu, tangka in lente i celhnak a tuah pin ah ngunkhuai zong a khawlh hna. Tualchung mi zong a phunphun in a hrem hna i harnak a pek hna leng ah PDF an cawlcangh ning zong SAC ralkap sin ah thawng a pek tawn hna caah thah a tong, tiah theih a si.