Hakha inn kaang update news. Hakha ah Pu Hrang Cung le Pu No Hnin inn a kaang, minung 6 an thi. 2021 February 2, zinglei 5:40 tluk ah Hakha Dillo Sang um, Zokhua khuami Pu Hrang Cung le Thantlang Peng Hriphi khuami Hakha um Pu No Hnin inn a kaang, Pu Hrang Cung fale 5 le a nau fa 1 an thi.

Hi kong ah inn ngeitu Pu Hrang Cung nih, “Voidang tawn ahcun zinglei suimilaam 3:00 ah hin ka tho i rawl ka chuan dih tawn. Zahan cun ka mitkuh a thaw tuk i kaa hlau kho lo. Kan uicote a bao tuk i kaa hlau. Ka vun i hlauh ahcun meikhu kaa haak cang. Tho zokzok u, tiah ka au i kan nu cu a tho manh. Thlalangawng ka bauh i ka fale pahnih cu ka hlonh (leng ah chuah) manh hna. Kan nu he kan zaam manh ceo khi a si.

Ka naufa Samuel zong aa tel. Ka fapa Amon Bawi Chit Htoo hi kan hnuleite ah motor nih a pah i a ke kiah ca ah a zaam manh ve lo. Zeitin mei kangh aa thok ning zong ka fiang kholo,” tiah The Hakha Times ah a chim. Hi kong ah Hakha Meithat Zung lutlai Pu Thian Nuam Maung kan pehtlaih nain aa manh lo tuk ca ah thilri zeizat man dah a ciam ti zong hngalh khawh a si rih lo.

Innpa Pu No Hnin inn pakhat zong a ciam ve nain innhlaang hi Lo ah a riah kar a si ca ah annih chung cu an luat. Pu No Hnin inn hi inn hnih a si i inn khat cu a ciam dih. Anmah chungkhar umnak inn tu cu a him. A thi mi hna hi kan theih tawk ah; Par Tha Hlei, Ngun Sui Par, Amon Bawi Chit Htoo, Ngun Cin Hniang, Ngun Tha Len, le Samuel an si, tiah kan theih. Credit: The Hakha Times

Relchih: Pi Suu Hi Zaangfak Ngai A Si! Cozah an rak tlaih kaa in ralkap lungton aa zuam lengmang. A sullam cu: Ralkap nih uknak an lak thannak ding ah a ruang (reasons) an ngeih naak hnga lo a lam kip in a kunpiak lengmang hna. Ralkap lungput a hmaan lo zia le a fehfuan lo zia a rak theih tuk. Hngakchia tuahsual umh bak in a rak umh hna i, an duh hoih in a umpiak hna. Mipi le ram zawn a ruah ruangah zeibantuk tuar har tuar zong a poi ah a chia lo.

A tuar a fak tuk. Rohingya kongah security kan him lo an ti sual lai i uknak an lak than sual lai tiah amah nih vawleicung mi vialte sualpuhnak aa khinh dih. Suu Kyi cungah mawhphurh vialte a rak tlung. Ram tam pi nih upatnak an pekmi lila tiang in chuh than a tong. Asinain aa in. Tlaang Cung mi kong zongah mawhphurh vialte a tong. Aa in thiamthiam. Ka chim ve i kaa runven ve a si ahcun ralkap pawl ka huarsuan sual hna lai i uknak lak thannak khua an khaang than sual lai tiah amah nih tuarnak aa ham i ralkap tu cu a tuarnak hma le lungthin in a thlemh hna.

A bochan tukmi U Ko Ni an thahpiak lio zong ah daite in aa in. Ram a dam kha a biapi tuk ah a chiah. Doh le kalh in cun kan tei lai lo ti a fiang; a lam zong a si lo ti aa fiang. Nemnak in kan nemter hna lai ti kha a hmuitin a si peng. Cuticun kum nga a vun dih. Thimnak a vun um than tikah aho party vanhai loin cozah ser kho ding tiang in mipi nih a dirpi than hna. Ralkap party pawl cu anmah ralkap chung dah ti lo cu aho hmang nih a duh hlei hna lo. Hi hnu kum nga chung a kan hruai than ahcun kan him lo chin lengmang ti zong an theih. An i runvennak phunghram zong virhkhoih khawhnak lam a um chin lengmang.

An him lo chin lengmang. Hruh lam an zulh than lo ahcun an dai chin lengmang cang. Cucaah an ziaza thing ah an phohpian than sual lai tiah a toderhpiak lengmang ko hna bu ah vote hrokhrolnak nan tuah tiah lulam hngal loin atu bantukin nawlngeignak an lak thannak a si. Atu bantukin a ruang an kawl lo cun nawlngeihnak ngeih than khawhnak lam an ngei fom ti lo cu! Suu Kyi fimnak, nunnemnak le ram dawtnak cu tei awk a that ti lo caah nawlngeihnak tlaih than khawh lam hramhram in an kawlnak a si.

Thih lai ekceh bantuk a si cang. Caan nih lai a rel than lai. Zoh rih a hau. Atu cu zeitluk in dah ralkap nun le ziaza thlemh a har ti kha vawlei pi nih a hmuh than cang. Ralkap na runven hna; na dirkamh hna an ti i upatnak an pek ciami lila tiang an chuh thanmi kha a thar in khua an ruat than cio cang hna lai. Pi Suu i a ram dawtnak, a fimnak le a tuarnak vialte hna hi upat lo awk an tha hrim lo. By Luther Tin Hre