Tuzing August 2, 2022 zingka te ah Malaysia ram i um Kawlram mi Mara peng a si mi an pa bik nih a fale pathum cu hlei cung in a thlak hna hnuah amah zong a that ve tiah theih a si. Kuala Lumpur, Middle Ring Road 2 (MRR2) lampi cung i um hlei in a thlak hna. A fapa pahnih le a fanu pakhat cu a thlak hmaisa hna.

Anpa Kum 38 mi cu amah tein a that ve caah a fale pahnih cu a hmun ah an thi cawlh i, Desa Jaya traffic light pawngah thi cia in an va hmuh hna. A fapa ngakchia bik a hnu ah a thlakmi kum 2 mi tu cu a nunnak thaw aum rih caah siizung ah an tlikpi tiah theih a si. A fapa kum 2 a si mi i a tlaknak hmun cu rampi umnak ah a tla caah a nunnak thaw a him rihnak a si tiah an chim, An taksa cungah UNHCR card zong an hmuh chih tiah an chim.

Mithmutu nih an chim ning ahcun “Zingka suimilam 5:50Am ah Myanmar pa le a fale pawl cu kuttlaih in an kal liopi ka hmuh hna. A fale pawl a thlak hna hnuah amah zong a that, ka va chanh hna lai ka ti cu ka tlai cang” tiah a ti.

Chinram an khua cu Mara peng Fartlang khua an si tiah theih an si i, an pa min hi Pu Cholei (Meisakotla) Kum 38 a fale hi Vadetisoh kum-8 Vabiechose kum-6 hna le Vabiechopha an si, hringtu an pa he pathum an nunnak a liam i pakhat ahniangbik hi sizung ah an kalpi.

Nihin thawngpang dang: Kachin Ramkulh, Waimaw Peng SAC Ralkap Sakhan Pakhat Cu KIA Nih An Lak!: Kachin ramkulh, Waimaw peng Inwamyan SAC ralkap sakhan pakhat cu kan kah i, kan khanghtak tiah KIA nih an thanh. Nihin August 2 zinglei ah SAC ralkap kuttang um pyi-tuh-sit le SAC ralkap phufonh an umnak sakhan cu KIA nih an kah hna, tiah tualchung media nih an langhter.

KIA brigade 5 battalion 3 hmunram Inwamyan khua pawng i SAC ralkap sakhan cu KIA nih kan kah i sakhan zong kan lak leng ah an hriamthil cheukhat zong kan lakpiak hna. Cu sakhan cu kan khangh i kan hrawh dih, tiah KIA lei nih an thanh ve. Kahdohnak ah hliamhma tuarmi le nunnak a liam mi an um le um lo cu theih a si lo. Chunhnu ah Waimaw um SAC ralkap khah-lah-yiah 58 nih minung thazaang 50 hrawng an chap ṭhan caah kaphnih kar kahdohnak a chuak kho ṭhan, tiah KIA lei nih an thanh.

Monywa Laṭi Sang Um Mi Mytel Zung Cu PDF Nih An Luhhnawh i, Wifi Seh Pawl An Khangh!: Sagaing ramṭhen Monywa khua Laṭi sang ah SAC Ralkap nih a thli in an on mi Mytel zung cu nihin August ni 2 zaanlei suimilam 2 hrawng ah tualchung hriamtlai phu nih luhhnawh in an hrawhpiak hna, tiah Monywa People Defense Fotce (MPDF) sin in kan theih.

Mytel wifi seh 100 leng, Routers seh 4 line Cutter seh 4 laptop 4 le rian he aa pehtlaimi cauk pawl hna cu an lak i seh thilri pawl hna zong mei in kan khangh tiah MPDF nih an langhter. Mytel zung hrawhnak ah hin Monywa People Defense Force (MPDF) Monywa pengkomh Battalion 1 Monywa tualchung ralvengtu phu hna an i fonh tiah theih a si.