Nawi Dam kan tuah lai nan timi kong ah Pu Zo Bawi, Pu Sony Thang Cung inn te ah nan ra i thil sining ka nu le ka pa le ka u le nan rak chimh hna a ṭha tuk. Nan dirhmun nan sining kan in theih thiam piak hna. Kan lung nuam ve lo. Ka Pu le ka pi nih tuan tuk ah a kan kal tak.

Ka pa nih dinfelnak le tluk ruang tein tlawnlen hi a kan cawnpiak na pu duhmi si a kan ti. Hakkauh le porhlawt le mi zeirello te hna hi an duh lo. Din lo i ka pu kutneh a simi dum he inn he um dihmi Cozah nih theng in an chunh dih lio ah hin Halkha i a rak pemmi nih inn tung an dirhnak ca cun tuah ko hna seh an rak ti.

Kan Nawi rawn baltetu cu Cozah kut ah kan in pe siang ti lo. A dang nan lo hmaban(Timit tilak,Halkha khua chung hmun thur) nan chuah rih lomi pawl kha chuah ta u law ṭha lai. A dingfelmi zumh awk tlakmi le miphun a dawt taktak mi mino hruaitu ṭha a chuah tikah Nawi Dam tuah ding cu kan ruah ṭhan te hna lai. Caṭialtu: Lily Ca Hlei Tial

Salai Lungthli Tum nih hitihin ahmuhning a chim ve mi cu; Mah hi ka rel i ka lungtha lo ngai, hmun ngeitu zong ka zaangfak hna(hmun man phaisa cu pek an timh ko hna nain). Cozah lei zong uar an um, hmun ngeitu inn bak ah va len i zaangfah an nawl hna khi upat tlak ngai an si.

Nawi Dam(Tidil) khi Hakha dinti laknak le khua dawhternak caah timi saduhthahnak he Laimi kan pa VP Henry Van Thio tawlrelnak in tuah an timmi a si, budget zong billion tampi a tla cang. A chel ahcun zapi caah thatnak tuah kan tim ah hin huatnak ah a mermi cheukhat an um theu tawn, a retheimi caah lung a nuam tawn lo. Hi ruang ah zaran nih cun Laimi caah thatnak tuah an tih, thangchiat an duh lo caah. Salai Lungthli Tum

Note: Hi kong he pehtlai in caṭialtu nih amah ṭialning tein kan rak chiah. Biafang chapmi belte a um lo nain, tlawmpal kan remh pah.