Khi caan lioah khan Israel ah siangpahrang an um lo; aho paoh nih anmah mithmuh ah a tha an timi cio kha an tuah. (Biaceihtu 21:25). Israel mi tuanbia ah hin Biaceihtu chan hi chan karlak Joshua hruainak le siangpahrang uknak karlak chan a si. Hi chan ah hin Moses le Joshua bantukin hruaitu an ngei lo i siangpahrang David le Solomon bantukin uktu le hruaitu an ngei lo lio a si. Israel mi cu Biaceihtu hna nih Moses bantukin an rak hruai hna lo i siangpahrang bantukin an uk kho hna lo. Cucaah hi chan Israel mi hna sining cu duh a nung lo ngai. Hi chan hi kum 340 tluk a saumi chan a si.

Hi chan Israel miphun sining cu: sualnak an tuah harnak an tong harnak chungin Pathian an auh Pathian nih a leh hna thluachuah a pek hna sualnak an tuah than. Cuti lengmang cun an sining cu ai mer lengmang. A fekfuanmi hruaitu le uktu an ngeih lo caah mi kip nih sualnak kha fawi tein an tuah. Phung in mizapi a tlaitu an um lo caah mi kip nih ‘anmah mithmuh ah a tha an timi cio kha an tuah. Sualnak kha sualnak tiah auh loin an mit ah ai remmi a si ahcun fawi tein an tuah caan a si. Pathian lung an ton lo ngai caan a si.

Kannih zong cu chan ah cun kan um ve. Sualnak kha a min din in auh chan, thatlonak kha an min thlen chan, biatak kha anmah duhmi a si lo ahcun asiloah anmah sining he ai khah lo ahcun a kam ah hnon chan a si. Hlawhhlang zong kha pumpak zalonnak ah chiah chan, nu le nu thitumhnak le pa le pa thitumhnak kha mah duhthimnak ah chiah chan, sualnak le thatlonak nih zatlang nun ah hmaihngal ngai in an um chan ah kan um cang. Hlan ah zohchiah ah ruahmi kha zohrem ah chiah a si cang. Fihnung ah chiahmi kha conglawmhmi a si cang. Biaceihtu chan he zeihmanh kan i dannak a um lo.

Pathian fale hna hi caan lio i Pathian tanh le biatak dirpi cu tihnung a si i a har hringhran ko. Zeitin na ruah ve? Hi chan cawnpiaknak thalo, phung thalo le nunning thalo lakah zeidah tuah ding a si ti hi na ruat tawn maw! Hi chan ah hin Pathian nih Amah le A Bia tanhtu ding le dirpitu ding ah thimmi na si kha philh hlah. Raithawinak nakin nawlngaih a tha deuh timi chan ah kan nung ti hi philh hlah u. Kan chan hi chan vialte lakah a thurhnawm bik chan a si bantukin Pathian mit ah zohremmi thil tuah a herh bik chan zong a si ve. Credit: Pastor: Then Kep