US House Speaker Nancy Pelosi le Taiwan President Tonnak An Ngei! Taiwan ah kal lo ding in Tuluk nih US cu a kham len nain, Tuluk nawl ngai loin US House Speaker Nancy Pelosi cu nizan ahkhan Taiwan a phan i, nihin August 3 ah Taiwan President he tonnak an ngei. Taiwan Hluttaw ah biatawi a chim i, Hluttaw palai hna he zong tonbiaruahnak a ngei.

Taiwan nuhrin covo a dirpitu hna he zong tonnak a ngei lai i, zanlei ah S. Korea ah a lan te lai, tiah theih a si. Tuluk nih Taiwan thilri pawl cu ka kham tiah a thanh i, Taiwan pawngkam ah raltuk cawnnak zong a tuah. Pelosi nih cun US nih Taiwan hnu a chittak lai lo kong a chim i, Taiwan a dirkamh kong zong a chim. Pelosi nih cun, “Taiwan ka ratnak sullam cu Taiwan Democracy ka dirpi caah a si,” tiah tonbiaruahnak ah chim. Credit: The Chin Post

Dr. Rual Uk: ONENESS PAUH PAUH NIH. BAIBAL CHEU KHAT, AN HLAWT, AN CHAP, AN THLEN, AN MERH. Oneness Judah mi hna nih Jesuh kong țialnâk Biakam Thar Baibal uk 27 hi Baibal ah an cohlâng duh lo i an hlawt. USA in zûmtu cheu khat hna nih anmah Hebru holh in țialmi Biakam Thar Baibal hi Israel ram ah tam nawn an kuat cang nain ni hin tiang an cohlâng duh lo i an hlawt peng ko rih.

Mithiang lâk hnu lawng lawng ah an lung a fim te lai i an hlawt mi an Messiah le Messiah kong țialnâk Biakam Thar hi an cohlân te lai. Oneness Muslim hna nih Baibal chimmi cheu khat an cohlân lio ah Baibal chim lomi kha an chap. Jesuh nih misual kan caah a nunnâk sunglawi a pek ruangah Vailamtahnâk ah khenhchih a simi biatak kha lih a si tiah an ti. Vailam ah an khenhchihmi kha Jesuh si loin Jesuh vailamtahnâk thing putpiak dingah Rom ralkap nih an fialmi Sairin khua mi Simon kha pei vailam ah an khenh chih ko cu tiah Baibal ah a um lomi kha an chap.

Oneness Jehovah’s Witness ai timi hna nih Jesuh cu Pathian pakhat ah Mi pathum hna lak ah Mi pakhat a si ti kha an cohlâng duh lo i Jesuh Pathian a sinâk zawn țialnâk Johan dal khat câng khat donghnâk zawn ah:- “Bia cu Pathian a si (the Word was God) timi zawn kha:- ‘bia cu pathian pa khat a si’ (the word was a god) tiah Baibal Bia kha an thlen i an chap.

(Tu lio fb cațialtu cheu khat nih ‘Pathian’ tiah țial ding a simi kha ‘pathian’ tiah a țialtu hna zong hi anmah nih an i hngalh hlan ah Jehovah’s Witness hnu zultu si dawh an si) Oneness Jehovah’s Witness ai timi hna nih cafang ngan ‘B’ timi kha cafang hme ‘b’ ah an thlen i cafang ngan ‘P’ kha cafang hme ‘p’ ah an thlen hlei ah Baibal ah a um lomi ‘pakhat’ timi kha an chap.

Oneness UPC hna nih:- Biakam Hlun Jehovah kha Biakam Thar Jesuh hi a si tiah Baibal merh hram an thawk. Biakam Hlun ah KEIMAH tiah ai titu kha Biakam Thar ah Keimah ai titu Jesuh hi a si tiah Baibal merh kha an hun peh. Biakam Hlun ah Ban thlir in Israel mi Ezip sal sinâk in a tlanhtu kha Biakam Thar ah Vailamtahnâk ah Banthlir in a kan tlanhtu Jesuh kha a si tiah Baibal merh kha peh zulh a si. (Jesuh nih vailam ah a ban a thlir lo. Rom ralkap nih an khenhchih mi a si)

Jesuh nih ka Pa tiah a ti lengmang mi kha minung a sinâk nih Pathian a sinâk a kawhnâk a si tiah Baibal merh an peh zulh ko rih. Vailam cung in Jesuh nih, ‘Ka Pathian, ka Pathian zeicadah na ka kaltâk tiah a timi zong kha Pathian a sinâk nih minung a sinâk a kaltâk mi a si tiah Baibal merh cu ngol an tim ti rua lo. Pa sunparnâk nih Khrih cu thihnâk in a thawhter (Rom 6:4) tiah Baibal nih a timi zong kha Pathian a sinâk nih minung a sinâk a thawhter mi a si tiah ngol loin Baibal an hun merh țhan.

Thihnâk in thawhter a si hnu ah cun Jesuh nih minung a sinâk cu ai thawhpi ti lo ti kha an zumh ko. Asinain a thawhțhan hnu le vancung a kai hnu tiang in Jesuh nih ‘Ka Pa’ tiah a ti lengmang mi zong kha:- Fasinâk kha ai hlân rih caah a si tiah, a chimtu anmah hmanh nih an zumh khawh lo ding tiang in Baibal an hun merh țhan. Van a kai hnu zongah Jesuh nih Tlângbawi rian kha ngol loin a pehzulh i zûmtu kha Pa sin ah a kan nawlpiak ko rih tiah Baibal nih a timi zong kha Fa sinâk ai hlân rih caah a si tiah Baibal kha an merh țhiam țhiam ko rih.

Vawlei donghnâk tak tak a phâk hnu ah Fapa Jesuh Khrih nih Pennâk kha Pa Pathian sinah a chanh te lai (1Kor 15:24) tiah Baibal nih a timi hi ta merhnâk lam dang an thei rih hnga maw?.Pa cu a dang tein a um lo tiah an ti caah Pennâk kha Fapa sinâk ai hlântu Fapa nih khan Fapa tak tak a simi Fapa sin lila ah a chanh te lainâk a si tiah an merh țhan a herh te ko lai. lângkawmnâk:- Oneness Judah mi nih Baibal cheu khat an hlawt Oneness Muslim nih Baibal cheu khat an chap Oneness Jehovah’s Witness tiah ai timi hna nih Baibal cheu khat an thlen Oneness UPC hna nih Baibal cheu khat an merh.