House Speaker Nancy Pelosi spokesperson Drew Hammill nih a chim a chimning ah cun, January 6, ah Trump supporters nih Capitol Innpi an luh hnawh lio ah Pelosi Laptop an fir tiah a chim. Amahbel, an firmi laptop hi meeting tuah lio ah presentation caah a hmanmi asi tiah a chim chap. Sen. Jeff Merkley (D-Ore.) nih a chim ningah cun, laptop hi amah office chung in an lak tiah a ti.

Mah laptop chungah hin mipi nih theih awk tha lomi a um kho men tiah an zumh. It was a laptop that was only used for presentations,” Pelosi spokesman Drew Hammill wrote in a Jan. 10 statement. Pelosi laptop an firmi hi zeitindah kan hmuh khawh than lai tiin an i zuam cuahmah lio pi asi. Mah laptop software chungah a biapi mi a chiah le chiahlo zeihmanh fiang tein chimmi theih a si rih lo. A biapi mi le thlithup thil tuahnak documents hna a um sual ah cun Pelosi caah cun a poi tuk ding asi cang.

Thawngpang dang rak rel chih: Nihin ah Theepochtimes nih alanghter ningah cun, House Republican nih Biden sinah phungning tein nawlnak an tuah. Mah nawlnak an tuahmi cu, Pelosi nih President Trump cu a voihnihnak impeachment tuah aa timmi hi tuah thanlo ding le ngol dingin nawlnak an tuah hi asi. Nancy Pelosi cu nangmah nih rak kan chimh piak ti asi ko. Mah nawlnak ca cu Rep. Ken Buck (R-Colo.), nih House members 7 aiawh in a pek.

President Trump cu January 20 hlan hrim hrim ah impeachment tuah I, office in thawl dingin Pelosi nih timtuahnak a ngei. Cu caah House Republicans an thinphang asi lai dah, zeiti asi hmanh ah President Trump hi impeachment tuahlo dingin Biden sinah nawlnak ca an tial hi asi. Mah nawlnak ca I an tialmi cu, Speaker Pelosi nih impeachment a kalpi lonak hnga nangmah nih tuanvo kan lak piak law tiah upatnak he kan in nawl ti asi.

Rev.Rual Uk: US nih Biatak Amertak I, Pathian Cu Hnu Achit Cang. Dinâk nih miphun a cawisân. Phu. 14:34 (Righteousness exalts a nation). Hi Cathiang bia hi minung lei khêl in a țialtu cu Pathian nih miphun caah ai thimmi Israel Siangpahrâng pathumnâk Solomon a si. Siangpahrâng Solomon chan ah hin an umnâk Kânân ram in nichuah, nitlâk, chak le thlang ah a ummi vialte le vanhram deng tiang in theih khawh le hmuh khawh in cu miphun le ram cu cawisân a rak si. Solomon fimnâk le rumnâk hngalh le hmuh duh ah Jerusalem in meng 1200 a hlâtnâk Sheba ram siangpahrâng tiangin Jerusalem ah a ra. Cathiang hrim hrim nih “Cuticun Siangpahrâng Solomon nih vulei cung i siangpahrâng vialte kha rum le fimnâk ah a lonh dih hna” tiah a ti. 1Sia.10:23.

Jesuh zong nih Solomon rumnâk kong kha tlâng cung cawnpiaknâk ah a rak chim. Mt.6:29. Asinain careltu nih kan palh hrim hrim lo ding ah a biapi tak takmi cu kan tlângtâr “Dinnâk nih miphun a cawisân” timi hi amah Solomon dinnâk ruangah si loin a pa Siangpahrâng David dinnâk ruangah a si. Zeicatiah Cathiang nih ” Hit mi Uriah kong dah ti lo David nih Jehovah mithmuh ah a dikmi (dinnâk) kha a tuah i a nawlpêk a zeipauh a nun chung vialte ah a pialtâk bal lo”, tiah a ti. 1Sia.15:5. Pialtâk loin Pathian nawlpêk a zultu Siangpahrâng David dinnâk nih a miphun le ram cu vamhram deng ah a ummi theihhngalh le hmuh khawh tiang i sawisân a sinâk kha a fapa Siangpahrâng Solomon nih a hmuh tikah:- “DINNÂK NIH MIPHUN A CAWISÂN” tiah a rak timi cu a si.

Dinlonâk nih miphun a țhumh. Apa David dinnâk nih Pathian pekmi Kânân ram le Pathian thimmi miphun cu vanhram deng tiang hmuh le theihhngalh tlâk in cawisân a si lio ah a fapa Siangpahrâng Solomon dinlonâk nih Pathian pekmi Kânân ram le Pathian thimmi miphun hna cu a tawne tiang ah țhumh an si ti hi a hmunmi biatak a si. Apa David nih Pathian nawlpêk kha pialtâk loin dinnâk lam kha a zulh lio ah a fapa Solomon nih Pathian nawlpek kha piaktâk in dinlonâk lam kha a zulh caah biaknâk hruaitu tlângbawi hna le an mirum hna le an zatlâng nun cu a tângmi um loin a rawk cikcek.

Hi lio cân ah Pathian nih a thlahmi profet Amos nih ” Diknâk kha ti bangin luang seh law, dinnâk kha tivapi bangin luang seh” (Amos.5:24) tiah a rak timi kha zei ah an rak rel lo caah miphun pahra nih an tohmi Samaria khualipi cu BC 722 kum ah milem a biatu Assiria cozah nih a lâk i Samaria khualipi cu lêng le vâl rual tampi thisen luannâk hmun ah ai cang. Sântlai lo le mi țiațum lo nu cheu khat dah ti lo cu an nun chung vialte ah an țuanman hmanh hmu ti lo dingin Assiria ram ah sal ah kalpi dih an si. Cuticun ‘Dinnâk nih miphun a cawisân’ timi ral khat lei ah ‘Dinlonâk nih miphun a țhumh timi cu el awk țha loin a hmunmi Biatak a si.

Khuaihliti le cawhnuk in a khatmi Kânân ram cu hnulei chit in an nun chung vialte ah an țuanman hmanh hmu ti lo dingin milem a biami Assiria ramah sal dirhmun ah țhumh an si. Miphun pahnih nih an tohmi Jerusalem khualipi zong dinnâk kha lamkam ah a ril i dinlonâk kha lam laifang i a dir tik ah an miphun pa bik Abraham Pathian nih a rak kawhnâk hmun Babilon (nihin ah Irag) cozah nih BC 586 kum ah a lâk.

An rawlțâm an celh lo tuk ah nu nih an chungchuak an fa le kha that in an sa an ei i Jerusalem khua zatlâng lam hna cu lêng le vâl rual thisen luannâk ah ai cang i Solomon nih a rak sakmi Jerusalem Țempal pi le siangpahrâng inn vialte cu vutcam ah ai cang dih. An chan chung ah hmu kho ti lo dingin an dawtmi Jerusalem khualipi cu hnulei chit in Babilon tiva kam ah ah an thazâng um ek in tlakrawh an sernâk an țuanman tiang hmu ti lo dingin sal dir hmun ah țhumh an si.

Pathian Biatak zulhnâk nih a chuahpi mi dinnâk nih miphun a cawisân lio ah Pathian Biatak zulhlonâk nih a chuahpimi dinlonâk nih miphun a țhumh timi hi bia tlâng lawn sawh sawh si loin thlen khawh lo le el khawh loin a hmunmi biatak a si. Hi tluk in ram țha a simi kawlram zong hi vawlei ram vialte lak ah dinlonâk ah a pahnihnâk a si bangin vawlei cungah sifak bik ram ah țhumh a si.

Za ah za dengmang Kristian (Khrihfa) ai timi Chin State zong kawlram chung State vialte lakah dinlonâk (eihmuar) a tambiknâk a si bangin sifak bik ah țhumh peng dawh kan si. Inn Râng pi cu Inn Nak pi ah ai cang: America ram a rak hmu hmasa tu le a rak dirh hmasa tu hna nih an saduh thah ngan bik le an thlacamnâk cu “Pathian le a Biatak a dirkamhtu ram le miphun siseh” ti hi America hrambunhnâk tuanbia tlângkomhnâk tawi fel a si.

Cucaah an Phaisa tiangah PATHIAN KAN I BOCHAN ( IN GOD WE TRUST) tiah a tu tiang in țial a si Pathian le a Biatak a dirpitu hna dinfelnâk nih Vawlei pa timi dirhmun tiangin America a cawisân timi hi a hmunmi biatak a si. Asinain kum zabu 18 hrawng ah Germani ram Berlin khualipi ah Christian University i theological department ah Julious Well Housen an timi pa nih hram a rak thawkmi Liberal theology nih Europe rampi Christian vialte cu Pathian le a Biatak dirkamhnâk hmunin a tlukter hna.

Cuka ah Ph D a cawngmi America pa C. A. Briggs an timi pa nih America ram Christian hna cu Germani ram ah a cawnmi Liberal theology hmangin Pathian le a Biatak dirhkamhnâk in a tlukter hna i zumhnâk lei ah Laimi phun a kan hringtu Northern Baptist hna cu a tângmi um loin a hrawh cikcek hna.

Liberal theology timi cu Pathian Biatak lunghrinhnâk in ai thawk i a hnu a hun zultu cu Pathian le a Bia ralchanhnâk in a dong. Cu hna cu nihin ah America Inn Rângpi ah luh ai timmi Democrat tiah kan theihmi hna cu an si. Baibal nih ‘ pa le nu kha a ser hna’ Hra.(Gen)1:27 tiah a timi kha ralchanh in nu le pa ti um ti hlah seh, fanu fapa ti le pi le pu ța le far ti zong um ti hlah seh tiah kalpi ai timtu hna hi Liberal timi cu an si.

Paw chungah kan i sem hlan le nau inn chung in kan chuah hlan hmanh in akan hmutu le akan hngaltu Pathian le a Biatak (Jeremiah 1:5 Sâm.139:15-16) kha ralchanh in paw chung naute thah le hrinmi naute thah zong nuhrin covo ah a ruat i phung ah ai ngeihmi, tol ah naupawi ai tim i tawka kua in nauhrin ai tim mi tawka hor hna le pa le pa nu le nu ai țhium i an thlacam donghnâk hmanh ah Amen le A women tiah a timi Liberal hna kha America Inn Râng pi ah lut in hmunhma an lâk tak tak ah cun:- Pathian le a Biatak umnâk Baibal i tlaih in biakamnâk an rak tuah tawnnâk Inn Râng pi cu Pathian le a Biatak ralchanhnâk Inn Nak pi ah ai cang tinâk a si.

Pathian le a Biatak an dirpi ruangah “Vawlei pa” tiah timi dirhmun ah cawisân a simi America cu:- Pathian le a Biatak a ralchanh i Pathian mi le fak tak tak in a serhsat i a hremtu Tuluk Communist Party fa ei ah țhumh a si tinâk a si. Dinnâk nih miphun a cawisân Dinlonâk nih miphun a țhumh Inn Râng pi cu Inn Nak pi ah ai cang.

_______

Copyright © Chin World News Evening