US, Texas State, Midland khua ah nawmsawh a tongmi pafa hna caah Reagan Hignojos Facebook account in donation an tuah piak hna i tuzarh Wednesday ah khan Fund a kawlpiak tu, namsawh a tong mi ngakchia hna i sianginn sayamah le Midland county district Anthony nih an va ton hna i bawmhnak phaisa zong an va pek hna ee tiah thawng kan theih! Credit: Reagan Hignojos (Chin Cable Network)

PA BAWI CUNG NUNG LE A FAPA KONG UPDATE: Nizan ah thawngpang kan tialmi Pa Bawi Cung Nung le a fapa Robert cu hliam an tuarnak hma siibawi te nih tluang tein an thitpiak cang hna. A rauh hlanah siizung in an chuak kho lai, tiah zumh a si. Nam in a sawhtu pa kha Mirang pa tiah kan tial sual i a si lo. Hispanish pa tu a si.

Atu hi US cu Asian mi vialte thinphang le lungrethei in um a si cang. Dawr le mi an tam deuhnak hmun i kal tikah Asian mi cu an ka zohning aa dang. Lunghrinhnak, remlonak le huatnak mit in an kan zoh.

Laimi lebang hi cu Chinese nan si maw? tiah hal kan tong lengmang. Biakinn cheukhat an khar cang. Cozah nih khar uh tiah nawl pekmi an um bantukin mah tein a kharmi zong an um len. Biakinn cheukhat cu zanpumh lawng an khar i chun cu aa pummi zong an um. A ruang cu Covid-19 tih ruang lawngah a si ti lo, Asian mi kan him lo ngai cang caah zanpumh an kham chungnak a si. Karen pa cu zan tlai ah a lawi i cei ngai in an vuak cu mu!

Pathian sin tu ah thlacam ko hna usih. Hi zawtnak le hi zawtnak ruangah a chuakmi harnak le buainak vialte hi a rauh hlanah a donghnak lai Pathian sinah bawmh hal peng hna usih. Credit: Vakokauthawng

Harnak an tonning thawngpang ral ṭhan a duhmi nih rel khawh ṭhan a si:Tuni zanlai (March 14) 7:32 ah US ram Texas State, Midland khuaah a ummi Pa Bawi Cung Nung le a fa cu Sam Club (thil zuarnak) an kalnak ah Mirang pa nih nam in a sawh hna i siizung ah an phan, tiah theih a si. An pafa in an hmaiah a sawhmi hna a si. A fapa Robert hi fak tukin a hliam.

A sawhtu pa hi Jose Gomez a si i kum 19 lawng a si rih. Pa Bawi Cung Nung hi Midland Chin Immanuel Baptist Church chungtel a si. Kum 2014 ah US a phanmi an si. Pathian a duh ngaimi a si, tiah theih a si. Laitlang lei a khua cu Thau a si nain Kalay ah a ummi an si. Atu hi Midland i siizungah an zohkhenh cuahmah hna lio a si.

Zeiruangah dah a sawh? ti le Bawi Cung Nung le a fa hliamhma kongah thawngpang fiangin theih khawh a si rih lo. Asinain nunnak dih tiang cu a phan hraw lai lo tiah kan theih.Coronavirus hi Asia ram in aa thokmi a si tikah Mirang cheukhat Asian mi cungah lungfahnak le huatnak an ngeih ruangah a si ko lai tiah an ruahdamh. Cheukhat nih cun dawr ah thil cawk ding a har ngai cang caah thil an i cuhnak hna ah a si kho men an ti ve.

Zei a si hmanh ah hliam a tuarmi Pa Bawi Cung Nung te pafa nih a rauh hlanah damnak an hmuh khawh nakhnga thlacam bawm hna usih. Cun Coronavirus zong cu a thian zau khawh nakhnga kan Pathian sinah thlacam cio ko usih.