Atu lio cu putar, pitar le hngakchia ti loin Myanmar Idol ah buai cio asi. A luancia kan zoh ahcun cu tluk Myanmar Idol zuamnak ah Chin mipi nih kan buaipi tuk lem lo, kanmah chungin aa telmi kan um lo ruangah si kho men. Sinain tutan cu Chin mipi lawng si loin Myanmar ram pumpi tiangah a langsar chin lengmang. Online zoh tik zongah Esther le Benjamin Sum konglam nih online mei inn cu an luah dih.

Tutan Myanmar Idol Season 4 zuamnak ah kan Chinmi chungin kan nau le pahnih, Esther Dawt Chin Sung le Benjamin Sum ko nih Chin min an tthatter i, an hmaihngal pi. Midang zong an thiamtuk tthiamtthiam. Myanmar ramchung top 10 zuamnak ah Chinmi chungin minung 3, 4 an i tel kho timi hi a um tuk lomi asi.

Zuamnak an thawk ka in a hnu bik (November 15, 2019) tiang zoh tikah judge sin in siseh, Myanmar mipi cheukhat zong nih Esther le Benjamin Sum hna pahinh hi an uar khun ko hna timi hmuh khawh si. Hi bantukin Chinmi chungah hi dirhmun a phan kho mi kan nau le pahnih hrim hi thangtthat le conglawmh tlak taktak an si.

Myanmar Idol Season 3 zuamnak lio zongah khan Chinmi chungin Nilen Parmawi a rak i zuam i, top 3 tiang a rak phan. Atu tan zuamnak ah Chinmi chungin aa telmi an tam tikah mipi zong nih a hleiin thazaang pek cio asi. Cun, kan theih dingmi cu mipi zong nih tha pek zia kan thiam taktak a herh. Tha pek ning cang kan thiam lo ahcun Kawl miphun caah chance tthatuk a rak si te lai. Hi kongah kan lungfim ngaingai a hau.

Cucaah Chin Miphun min tthattertu pahnih Esther le Benjamin Sum hi an dirhmun chungin an tlaknak ding le soisel, thangchiat le mualphoh tu si loin an tlinlonak ah tha pek ziathiam mi le sawisangtu si usih law, an tthatnak ah lawmhpi tu si hna usih. Mipi duh ning in an tuah khawh lo caan le an thazaang det lio caan zongah soisel thangchiat tu si loin anmah dirpi tu le ta petu si hna usih.

Anmah pahnih tuahsernak nih Chinmi lungput an langhter in zei bantuk dirhmun ah dah kan dir timi an langhter. Cun, tha petu mipi zong nih kan i ralrin a herh ngai mi cu, miphun dang le Kawl miphun hna theih ah ngaih nuam lo le zoh dawh lo pinah vote pek duhnak hloh tiangin au khuan le chim hna hi kan i ralrin taktak a herh.

Chin miphun cu mi tlawmte kan si, miphun khat kan si pinah unau kan si. Zeitik hmanh aa tthen kho ding le a uh ttenh ngam ding kan si lo. Kan hla, kan bia le nunphung nih unau chuak khat kan sinak a langhter. Cucaah hmunkhat te ah lungkhat in ttenrualnak caan kan theih hi a biapi tuk mi asi. Kan nau le pahnih zuamnak nih Chin miphun kan lungput a langhter lai hih.