John 8:19 “Na Pa cu khuazei ah dah a um? tiah an ti. Jesuh nih cun, Keimah zong nan ka hngal lo, ka Pa zong nan hngal fawn lo. Keimah kha ka hngal u law cu ka Pa zong cu nan hngalh ko hnga, tiah a leh hna” Mah Bible hi cheukhat caahcun a caang pakhat te lawng an lak caah an tlaunak asi. Kalsual kan timi pauhpauh khi Bible caang khat te lawng aa tlaih deuhmi an si hna. Mah Bible hi a context in zoh hna usih.

(1) JESUH NIH CEUNAK KA SI A TI (8:1-2) Jesuh nih Farasi le tlangbawi sin ah Keimah cu ceunak ka si tiah Buakinn chung ah a cawnpiak hna.. Keimah a ka zummi pauh cu nunnak ceunak an ngei tiah a chim tik ah Farasi pawl nih cun an zum kho lo. An nuh a chuak salam men lai.

(2) TETTE NA NGEILO AN TI. Farasi pawl nih Jesuh cu CEUNAK asinak kong a chimmi cu an zum lo. Cucaahcun ” Nangmah nih nangmah kong pei na chim ko cu ” an ti. (8:13). An chim duhmi cu na biachim cu a hman ko ti awk in Tette na ngei țung lo tinak asi.

(3) KA PA CU KA TETTE A SI. Biakhiahnak tuah tik ah Tette pahnih um hrimhrim a herh.( Deu 17:6 , 19:15). Mah Bible Moses cauk kha Jesuh nih aa chirhchan i, Jesuh nih cun “Nan Phung chungah pei, tehte pahnih an bia aa khen ahcun an chimmi cu ahmaan, tiah aa țial kha. tuah ati (8:17)

“Hi ka ahcun atu hi keimah ca i tehte cu keimah hi ka si, cun ka tehte a DANG cu a ka thlahtu ka PA kha a si, tiah a ti” (8:18) Jesuh nih a chim duhmi cu Ka tuahmi le ka rian hi keimah nawl in ka tuah lo. A dang Tette ka ngei, cu ka tette cu a ka thlah tu ka pa a si tinak asi. Jesuh nih Pa ka si a ti duhnak si bak lo hi mu.

TETTE PAHNIH asi mi FAPA le PA cu pakhat lawng an si lo ti kha Jesuh bia ah a fiang tuk. A DANG TETTE ati caah Amah Jesuh asi lo i, A Pa asi ti kha a fiang tuk. (4) NA PA CU KHUAZEI AH DAH A UM (8:19) Jesuh nih ka chimmi caah Tette cu a ka thlahtu KA PA asi ati tikah Farasi pawl caahcun nihchuah lei khi asi. Na Pa cu khuazei ah dah aum, na tette cu khuazei ah dah aum tiah capo phun, nehsawh thlanglamh in Farasi pawl nih an hal mi asi. Na pa cu khuazei ah dah aum ti cu “NA TETTE cu khoika ah dah aum kun” ti he a sullam aa khat.

(5) KEIMAH ZONG NA KA HNGAL LO (8:19) “Ka PA a zong nan hngal fawn lo. Keimah kha ka hngal u law cu ka Pa zong cu nan hngalh ko hnga, tiah a leh hna” (8:19) Jesuh nih a chim duhmi cu KEIMAH zong nan ka hngal lo, cun nan ka zumh lo ahcun Ka PA zong nan hngal kho lai lo. Nan ka hngalh i nan ka zumh ahcun Ka PA zong nan hngalh ko hnga. A THLAHMI mi keimah hmanh nan ka zumh lo ahcun A Ka THLAHTU KA PA chinchin cu zeitin dah nan hngalh khawh lai i nan zumh khawh lai tinak a si.

John 5:37-38 ah a fiang tuk “Cun a ka thlahtu ka Pa zong nih cun keimah kong ah hin tehte a khaan ve. A aw kha nan thei bal lo, a hmai zong nan hmu bal lo, cun a bia zong nan lung chungah nan i cinken lo; cucu zeicahdah a si ti ahcun a thlahmi kha nan zumh lo caah a si”

DONGHNAK John 8:1-19 nih JESUH cu PA asi ko tinak aum hrimhrim lo. PA le FAPA cu aa dang mi person (TETTE PAHNIH) an si nak Trinity asinak tu kha a langhter mi a si deuh. Jesuh nih PA ka si ko a ti hrimhrim lo. A ti bal fawn lo. Mi Pakhat lawng hi TETTE pahnih a si kho lo. Mah le Mah (Pakhat lawng) zong Tette i khang piak phung asi lo cu mu. Laknak: EXODUS-Chuahnak Lam