Vawleipi coronavirus raal dohnak ah lungrethei le lungmit in um a si lio ah Myanmar ah cun meithal le hriamnaam hna hmang in i tukkah peng a si ko rih. March thla dongh tiang in Myanmar Shan State nichuahlei ah cun Myanmar ralkaap le Shan ralkaap (tapung – insurgent) pawl cu khuate kip ah i kah peng a si ko. A sinain a tu cu an kaphnih in COVID-19 dohnak lei ah an lung a tlu deuh cang.

Restoration Council of Shan State (RCSS) foreign affairs department in Sai Yawd Muang nih The Irrawaddy sin ah a chimmi cu, meithal in i tuk lengmang nak cha hin cun COVID-19 dohnak ah hin kan lung kan chiah deuh awk a si tiah a chim. Thai ramri ah a ummi RCSS i an headquarter Loi Tai Leng zong lockdown tuah a si cang. Nan inn ah i erh viar cang u tiah Shan hruaitu pawl nih an thanh hna.

Coronavirus nih a chuah pimi thinphan thlalaunak nih hin rampi huap in ramkhel biaruahnak (national-level political dialogue) Shan State ah tuah ding in kan hnu thla ah rak ceihmi zong thawn hrimhrim a haumi a si tiah an chim. RCSS hruaitu General Yawd Serk nih cathanh a chuahmi cu hi zawtnak dohnak ah hin Shan State mipi kan dihlak in kan i tel. Hmunkhat te ah hi raal hi kan doh hna lai tiah mipi a thanh hna.

A chim chihmi cu RCSS medical team pawl nih Shan State khuate vialte an luh hnawh dih hna. Mi vialte an zawt le zawtlo kan zoh (check) dih hna tiah a chim. A sinain a ngaingai tiah cun an tak a linh le linhlo lawng an check khawhmi a si. Coronavirus an ngeih taktak le ngei taktaklo cu an check lem lo. A checknak thilri le hriamnaam an ngei lo.

RCSS hna nih Shan mipi hna sin ah an chim chihmi cu nan kut tthate le thiangte in nan i ttawl lai. Mipi he neihniam in nan um lai lo (social distancing) i hmaihuh zong nan hman lai tiah an chimh hna. Cu bantuk in social media hna hmang zong in khuate khuabawi kip sin ah thanh a si. A sinain zu in tuahmi kut ttawlnak (alcohol-based hand-sanitizing) hna cu an um hlei lo. Khuate tampi lebang ah cun kut ttawlnak saipiat taktak hmanh a um lo. An mah nih facang le tilum in an ser chommi pawl lawng an hman khawhmi cu a si. Ref: Irr