Myanmar ram cu lungrethei chin lengmang dirhmun a phan cang. Kawl ralkap tuanbia zoh tikah, ram mipi duhlonak langhtermi nih an lung a thleng kho bal rih hna lo; mipi thisen tu a luang tawn! Ramkhel lei thiamsang cheu khat nih, “2021 cu hlan lio deuh he cun aa dang tuk cang” an ti cio i cu aa dannak theipar cu a um phum te hnga maw, ti te khi kan i ruahchanmi cu a si.

UK nihcun “Myanmar ralkap uknak hi khirh tthan khawh a si ti lai lo. Zeicatiah vawlei cung democracy ram ngan bikbik hna nih ralkap uknak khirhter tthan ding tiang in an tuah khawhmi zeihmanh a um ti lo” tiah a ti. Nizan ah ralkap lei in Min Aung Hlaing nih ralkap dirhmun fiang tein chim nolhnak a ngeih tthan i kan biakam le kan tlahttem ti bak si ko khah! Cu lawng hlah, atu an ttuan cuahmahmi rian hnahnawhnak petu vialte (sandahpiahmi telh in) action kan lak cang lai caah minung cu zat kha zat leng a buu in um a ngah ti lai lo” tiah felfai tein ramri an ser cang.

Cu bantuk an ramri te lonhnak cun thisen luan hram aa thok tawn kha a si; a luan ciami caan ah! Sandahpiah caan a sau deuh deuh, mipi zong an thi a lin deuh deuh ve. Ralkap lei nih le an ramri an bitter deuhdeuh ve fawn. Cucaah ram chung ummi kan miphun hawi hna hi an him lo chin lengmang cang. Zeitik poh ah thisen luang kho peng dirhmun kan phan cang hih! Fak chin lengmang in kan miphun le kan ram caah thlacamnak ngei ko tuah hna u sih! Cattialtu: Pastor Hrambik Lian

Relchih: Ram pumpi CDM an tuah lio ah kannih lairam kan dai ngai ko. Ngandamnak zung lawng nih zung kai loin an um ngam atu tiang ah. Zung dang cu CDM an tuah rih lo tiin theih a si. Thla khat thla hnih nihlawh sung tih ah maw chanchung ralkap sal si kan i thim ko hnga? Kan caholh, nunphung, biaknak le miphun sinak tlau seh tiah a chan chan in an rak kan uktu ralkap cozah cu rian sungh ttih ruah ah kan daih ko ahcun ttihnak sal ah kan tang cang tinak a si.

Kawlram ah CDM a tuahmi cozah zung riantuan pawl cu a lak bak in mipi nih an ngeihmi vialte an pek hna. A rum ruangah maw? Rum hlah. An ngeih ruangah maw? Ngei hlah. Ralkap sal sinak doh ah an ngeihmi an i hrawm hna. Cu lungrualnak cu an hriam thabik a si i a tthawng deuh. Laimi nih cucu kan pupa chan in kan rak tuah ko tung. Atu a caan lio bak ah hin kan dai ko lai maw? Hruaitu pawl khawika dah an um ee?

Ram pumpi in khua kip le miphun kip nih an tuah lio ah kawl nih nehsawh cemmi sifak bik a sitermi lai miphun daih ko ding cu kan celh cio hnga maw. Ram thawngpang an theih lo maw a si, ngamhlo dah a si hnga ti ka ruat. CDM a tuahmi poah hi tulio ahcun ram dawtu miphun dawtu upat tlak bak an si. CDM a tuahmi cu laitlang khrihfabu zong nih rawl pek ding an si ko lo maw?

Khua nu khua pa nih dirpi ding an si ko lo maw? Cawlcangh caan a si. Tuanbia nih an in zoh ko hna. Nan fale nih an in zoh ko hna. Ram leng um nan unau nih kan in cuanh ko hna. Nan tuah lo ahcun zeitindah kan in bawmh hna lai. Bawipa bochan in le lungrual tein dinlonak cu rak doh ko u. CivilDisobedience Myanmar Challenge -chincdm -SaveMyammar -democracyformyanmar Credit: David C. Thawng