Myanmar ram Chin Sianghngakchia hna caah ka saduhthah

Chin News

Myanmar ram Chin Sianghngakchia hna caah ka saduhthah.

Image may contain: 9 people, people standing and outdoor

Nohawng thla ah Mizoram Laimi kan pale hruainak in CACC Laica Ruatkhangtu Meeting Halkha ah kai tel kho ve, ka kal lai ah ka hawile tha tein bia ka ruah ta hna i, LSA General Conference 2019 ah Chin State lei kan unau Lai Sianghngakchia Buu sawm ve dingin a tam khoh chung an hon ve khoh nak hnga sawm ve ding in an hna a tla i ti cun a herh ah cun ca zong tuah colh dingin ka Seal zong kai ken chih.

Halkha kan phan i, caan karlak ah Halkha ah hin Lai Sianghngakchia Buu an um maw, an office hna ah ton khoh an si lai maw tiah ka hal hna, cu ah an ka lehnak cu Cubantukin Buu pakhat hun fuh ding cun an um lo, Peng le Tlang khua hoih deuh in an dir hna i Office zong an ngei lo, nan sawm hna ding a si ah cun an Peng cio le an khua cio in sawm an hau lai, Chin State/ Myanmar huap in Headquarters a ngei mi an um lo ” tiah an ka leh.

Zanah Hawitha Salai Tha Bik Chuntai nih a ka len pi i, Halkha khuacuanhnak ah kan phan cu ah cun Lungphun nganpi ai phun i, cu lungphun ah cun Chin State chung Sianghngakchia Buu 11 le Mizoram in MZP le MSU min an tial hna, kan nih LSA cu an Conference lio ah kan i tel lo i a si lai kan min a lang lo. Khua fakpi in ka ruat cu hna lakah cun LSSB, Vailamtlang, Bualpeng etc an lang rih lo. hi nih a langhter mi cu Myanmar ramah hin Chin Sianghngakchia Buu fek tein an ngei lo i timi fiangte in a lang ko.

Mizoram ah hin Sianghngakchia Buu a ngan ngai mi Pali kan um cu hna cu, Mizo Zirlai Pawl(MZP), Mizo Students` Union (MSU) Aizawl ah General Headquarters a ngei mi veve, Lai Students` Association (LSA) General Headquarters Lawngtlai. Mara Students` Organanization (MSO) Headquarters, Siaha hna kan si. LSA le MSO hi cu District pahnih khat a huap mi kan si.

Mizoram Lai Sianghngakchia Buu dirhmun hi chim hmasa ah a tha hnga, Lai Students Association timi kan ngei i Kan General Headquarters cu Lawngtlai ah au i, Office mi inn luah in Bazar Sang ah kan um, kanmah tein Office sak lio mi Eletrict Sang LAWNGTLAI ah kan ngei i, 25 Lakh kan hman cang i kan lim rih lo, tukum April ah hin LADC Cozah nih 10 Lakh in an kan bomh than lai i cu hmang cun lim khoh a si kan zumh.

General HQ cu LAWNGTLAI ah a um i, Headquarter hi Saiha ah kan ngei than i, Sub – Headquarters timi hi Sangau, Bualpi NG, Bungtlang S, le Shillong (Meghalaya) hna ah kan ngei i, Aizawl hi Joint Headquarter a si, hi pinah hin Sub- Headquarter kan phu ve ko cang a ti mi hi khua tampi an um i General Conference kan ngeih paoh ah khua/ Peng hnih thum nih cun an hun hal tawn. Branch timi hi khua ngan deuh le Sianginn High School le Higher Secondary School cu an si dih ngawt.

Lawngtlai ah Office a ngei mi LSA General HQ nih hin hmunkhatah an kan fun dih i, a caan ah Sub-Headquarter pawl lungtlin lo caan hna zongah Min dang pu fawn lo i, Gen HQ tangah um duh lo in an mah te in an i zohkhenh caan hna cu a um ve tawn ko nain tu dirhmun ah cun Gen HQ tangah an um dih. Gen HQ ah hin Office Bearers paruk an um i, President hruainak in kal a si i, GHEC kan ti mi, General Headquarter Executive Committe hi Chungtel 22 kan ngei kho i, Appointed Secretary (Cultural, Eduction, Music & Literature, Information & Publicity, Games & Sports et) hi 8 kan ngei i, hi hnu ah hin Magazine Editor le a tuanpi hna Organiser timi minung 5 tiang kan ngei kho i Adviser pahnih le Sr. Adviser pathum kan ngei hna. General Headquarters ah hruaitu hna hi Ca a cawng lio mi le Sianginn/University a kai lio mi an si ti lem lo Under Graduat Degree an ngeih an cun OB an Election an cuh kho i Laimi a si lai ti bel a um, nain LADC cozah tangah cozah rian a tlai lio mi a si lai lo ti a si i, Mizram Cozah tangah rian a ngei lio mi a si ah zongah hruaitu a si kho.

Hi hna pinah hin Laihritlai a si mi Bawm le Pang hna nih an mahtein an ngeih mi Mizoram Bawm Students Association le Pang Zirlai Pawl cu kan tangah Affiliated in an um i Genreral HQ Lawngtlai nih a zohkhenh chih thiam thiam hna. Hibantukin kan kal tikah kan tangrual i lungrual tein kan um kho, Sangau harnak tonmi cu Bualpi harnak tonmi a hong si kho . Kumhnih dan ah General Conference kan ngei i Genreal Headquarters hruaitu thar thimnak kan ngei tawn, i Kumhnih dan thiam thiam ah Conference lo kumah Lairelnak Assembly kan ngei than hawi i khuakhan lairelnak kan ngei tawn.

LSA cu a thawng i Pengtlang kipah Sub-Headquarter a ngeih tikah cozah lei zong nih an upat i, Mipi zong nioh thazaang an pek i an sunhsak, cu a si caah Cozah he i doh caan le i kham caan hi an ngei lengmang ve tawn i Cozah hruaitu cheukhat huat zong an tong ngai ngai i hrawh an timh caan le Gen HQ kal kho lo tiangin an tuah caan zong a um ve tawn theu. Nikum 2018 zongah Lawngtlai District Commisioner thial a si mi duhlonak an tuah i Lengchuah sian lo ni hna.

Office kai sian lo ni hna an ngeih caah Mizoram Cozah Congress hruaimi nih a huat ngai ngai hna i Gen HQ hruaitu cu thenthiak dih an si i 2018 March thla ah cun LSA Gen HQ cu a kal kho tilo i hruaitu OB 4 nih an bantak, LSA Phunglam ah OB 2 lawng nih hruai khoh a si lo caah LSA Gen HQ cu Tribunal timi Laimi chungin upatmi le a dik timi pathum tangah Mizoram Laimi upa hna nih an chiah i, LSA GEN HQ a thih lai tak tak an sian lo caah a nun khoh than nak hnga fakpi in thla 3 chung rian an tuan i khua an ruah hnu ah Tribunal nih cun OB 6 cu a thar in a ruat than hna i kum 2018 September thla in tluangtein a kal kho than.

Hibantuk thil vialte ka chimnak a ruang hi zeitlukin dah Myanmar ram um Chinmi hna nih Sianghngakchia Buu a thawng mi le a ngan mi kan herh ti hi a si. keimah pumpak saduhthah le hi hnu kum 5 chung talah a tak in tlung kho sehlaw ti ka duh mi cu Kalay Myo ah maw Halkha ah dek General HQ ngei in Chin Sianghnagkchia Buu hi dirh kho sehlaw ti ka duh. a tanglei bantuk hin.

Image may contain: 6 people, people standing, crowd, sky and outdoor

Chin Students` Organisation
General Headquarters : Halkha / Kalay Myo
Headquarters : 1). Halkha/Kalay Myo
2). Thantlang Headquarters
3). Matupi Headquarters
4). Falam Headquarters
5)Tedim Headquarters
6) Tonzang Headquarters
7) Kanpalet Headquarters
8)Mindat Headquarters
9)Yangon Headquarters
10) Rakhine State Headquarters
11) Asho Headquarters
ETC..
Joint Headquarters ah:
Gangaw /Kabaw Valley Joint HQ
Mandalay Joint HQ
ETC… Sub Headquarters ah : Bualpeng Sub-HQ
2). Vailamtlang Sub-HQ
3) Mie Sub-HQ
4) Lailenpi Sub-HQ
5)Rih Sub-HQ
6) Tahan Sub-HQ
etc tiin peng le tlang cio ah a dir kho fawn lai i, Sub HQ a phu deuh rih lomi zong Branch in an dir kho thiam thiam hawi.

Zomi lei kan unau le Falam lei nih an kan zulh khoh rihlo hmanah Halkha le Thantlang lei tal nih hin hram hon thawk kho hnasehlaw zeitlukin dah a thawn hnga i kan miphun nih a thathnem pi hnga tiah khua ka ruat. Tu ah Peng le Tlang le Sianghngakchia Buu cio ah Hruaitu a si mi hna zong nih hin hmun khatah min pakhat tangah i funtom duhnak thinlung ngei cio hna usihlaw, Min pakhat tangah General HQ pakhat tangah um hi tim hna usih, cu nih cun Peng le Tlang thinlung pu in kan miphun ai thencheu cuahmah mi hi hmunkhat ah a hon funtom than khoh lai i, Lungkhat in Sianghnagckhia Buu hmangin kan um than kho ko lai tiah ka ruah.

Catialtu :Salai C. Vanramdinmawi

Hmanthlak : LSA Sub: HQ Sangau hruainak in Citizenship Ammendment Bill duh lonak lamzawh lio, Sangau khua

Leave a Reply