Kan rak thanh cang bang in nizan ah khan Chinese cozah nih coronavirus ruang ah harnak a tongmi Myanmar rawm bawmh ding in minung 12 a rak thlahmi hna cu an phan. Hi sii lei mithiam pawl hna hi an mah mipun lawng silo in coronavirus thlawpnak caah a herhmi sii le thilri pawl hna zong tamnawn an rak i phurh chih. Hi sii lei mithiam (medical expert) pawl Myanmar ram bawm ding in a rami hna hi Yunnan Provence, China minung hna an si. Hi phu pawl hi China National Health Commission nih a dirhmi phu pawl an si.

Hi minung 12 rak thlahmi hna hi thawchuahnak lei he pehtlai in zawtnak, i chawnh khawhmi zawtnak pawl, felfaite in thil sining zoh le kherhlai, Chinese thiamnak in serchuahmi sii pawl tibantuk ah a thiam hleimi an si hna. Hi hna pawl hi Yunnan le Yunnan Provincial Centre hna ah zawtnak hi zei tin dah kan kham lai i karhlo in kan tuahning a si lai tibantuk kong ah rian a ttuanmi an si hna.

China in a rak phanmi sii lei mithiam pawl nih hin an caam chung ah an thilri phurhmi pawl hna hmang in a si khawhchung in bawmh an i tim. A si khawhchung in mipi zong zawtnak an ngeih le ngeihlo hneksak an si lai. An thiamnak hna hi Myanmar sii lei mithiam pawl hna zong an chimh khawh vial chimh ding in timhtuahnak ngeih a si. Ref: Mzz