Vawleipi coronavirus kong ah buai lio ah thawngchia dang pakhat a thang tthan. Myanmar cozah uknak ruang ah minung 382 hna cu rili cung ah ni 58 chung tilawng in an vai. Hi an vaih chung ah minung 30 renglo cu an nunnak thaw a dih tiah AFP thawngzamhtu nih an thanh. Mizzima thawngzamh nih an thanh ning in Bangladesh rili congtu hna nih thla hnih deng rili cung ah a vai cangmi Rohingya ralzaam pawl cu chanh chuah an si, tiah an chim.

Rili cong aiawh biachimtu Lieutenant Shah Zia Rahman nih nithum chung hi tilawng hi kan kawl hnu ah nichuah chaklei rili kam ah kan va hmuh hna. Nga tlaihnak tilawng lianpi in Teknaf khua pawng rili kam a rak phanmi Rohingya ralzaam minung 382 hna cu kan va chanhchuah hna. Minung 30 renglo rili cung an viahnak ah an rak thi manh cang tiah Rahman nih AFP sin ah a chim.

Ni 58 chung bak hi tlawng hi rili cung ah an rak vai cang. Kan hnu ni sarih ah khan kan rili chung ah an rak phanh hi a si tiah a chim chih. Hi mi hna hi Bangladesh nichuah chaklei kam ah ralzaam in a um i Malaysia lei ah kal ai timmi an si. Coronavirus ruang ah Malaysia lei luh khawh a si lo caah a rak kir tthanmi an si tiah Dhaka Tribune local newspaper nih a chim.

Chanhchuahtu pawl nih an chim rihmi cu, hi Rohingya ralzaam pawl hi coronavirus zong a rak kai kho an si caah minung zeizat set dah an si ti zong fiang in kan rel ngam hna lo. Thathi in bia zong kan hal ngam rih hna lo. Minung 400 nak tam zong si khawh an si. Minung 32 cu rili cung an vaih lio ah an thi cang i rili chung ah an ruak cu hlonh an si tiah an chim kong an thanh. Ref: Mzz