Myanmar cozah nih ramchung coronavirus dohnak kong ah Myanmar a cozah le tlangcung hriamtlaiphu “Ethnic Armed Organizations” (EAOs) hna he rianttuannak cu an thok cuahmah cang. Hi hmunkhat rian ttuannak ding caah hin Myanmar President office nih kan hnu ah khan committee a rak sermi a si. President office nih committee a serhlan hrimhrim hin tlangcung hriamtlaiphu hna nih an mah le an ti khawhtawk in hi zawtnak in i runvennak cu rak tuah cio a si.

President office nih an thanhning in hi COVID-19 in i runvennak le i thlawpbulnak ah hin mizei paoh tlukruang te in zohkhenh an si lai. Zei bantuk miphun le biaknak an si zong ah. A ho hmanh hi phung leng ah an um lai lo tiah an chim chih. Cattialtu nih Myanmar cozah le tlangcung hriamtlaiphu hna hmunkhat ah fawizaangte in rian an ttuan tti khawh hmasa bikmi hi hi coronavirus dohnak rian hi a si lai. Zei bantuk a va si hmanh ah hmunkhatte ah mipi zawn ruat in rian an ttuanmi cung ah upat an um ngaingai tiah ka ruah.

National Reconciliation and Peace Center chairman Dr. Tin Myo Win cu hi committee ah hotu lutlai a si i chungtel minung pali an si. Hi phu nih ai tinh bikmi cu Myanmar ramchung ah coronavirus in i runvennak le cu bantuk hi zawtnak a ngeimi hna thlawpbul kha a si. Tlangcung hriamtlaiphu hna zong nih an mah le an umnak hmun cio ah ttuanvo la in hmunkhat ah rian an ttuan cuahmah lio a si. Ref: Mzz