MP Dr. Thet Thet Khine NLD Party Sinak In A Chuak: NLD Dagon, Yangon MP Dr. Thet Thet Khine cu October 31 ah khan Party sinak in a bannak kong cu NLD biachimtu Dr. Myo Nyunt nih mipi sinah thawngthannak a ngei. Kan hnu thla ah khan Party in chuahnak ca a thehluh cang nain atu lawngah OB meeting kan ngaih khawh i, a bannak cu pawmpiak in NLD Party in chuaknak a si” tiah Dr. Myo Nyunt nih a chim.

Dr. Thet Thet Khine hi Dagon NLD OB a si hleiah NLD Central i phaisa le tthanconak lei committee chungtel a si. Dr. Thet Thet Khine hi fimthiamnak lei zongah cawnnak sang a ngeimi si i, sibawi a si pinah business lei kongah thiamsang le cawnnak sang ngeimi a si. Cun, amah hi minthang le muidawh simi Myanmar rampum huap ah minthang, lemcang le hlasak thiam Htun Eaindra Bo a unu a si.

MP Dr. Thet Thet Khine nih hin phaisa kong le eikawlnak tthanchonak lei a tlaih tikah NLD Party nih thawngthanhnak he tinhmi he a kalt ttheu tawn. Cun, rampi Economy tthanchonak kongah NLD acozah cazin ning si loin a dihning le felfai tein rian a ttuan ruangah NLD Party nih a rianttuan mi cu an rak banter.

Amah telh in NLD Party, MP a bang mi hi minung 4 an si cang. Cu lawng si loin peng le tlang rian ngeitu NLD Party sinak in a bang mi hna an tam chin lengmang. September thla ah khan NLD MP le MLA 50 bak nih Party chuah tak in, Union Betterment Party “Thura Shwe Mann tlaihmi” ah luh an i timhnak kong cu a chuak nain atu tiangah fiangfai taktak cu a um rih lo.