India, Mizoram, Champhai pengkomh ah NUG kuttang a si tiah ruahmi PDF 3 cu hriam he an tlaih hna tiah Mizoram News nih a langhter. An tlaihmi hna hriamtlai 3 chung ah, minung 2 cu hma an tuar i thlopbul an herh caah Champhai pengkomh Melbul in Mizoram ah a rak lutnak hi a si tiah theih a si.

An tlaihmi hna hi Sagaing ramṭhen, Kalaymyo in Nyi Nyi Htun, Bo Min Thu le Phyo Thura hna an si. Rianngeitu pawl nih zohfelnak an ngeih hna lioah 9mm pistol pahnih an hmuh i bia an hal hna tikah ramri kan lonh lioah mah le mah i khamnak caah kan i putmi a si tiah an leh hna.

Cun, Chin ramkulh in PDF 14 nak tlawm lo cu Mizoram ah aa dormi an chung pawl tlawn hna ding in an i timhtuah lioah ramri tiva a simi Tio tiva Assam Rifles nih an tlaih hna. Mizoram chungah lut ding in Security Force sin ah nawlnak a tuahmi hriamtlai pawl zong an phan ko nain an zaam ṭhan tiah aa ṭial.

Chin ramkulh, Haimual khua cu SAC ralkap nih an khangh i mipi 5 zong an tlaih hna lengah mipi hriamtlai hruaitu i a unau 2 zong an thih caah khuami a za leng cu himnak hmun ah an zaam tiah theih a si. Haimual khua hi Mizoram Champhai pengkomh ah a ummi Zokhawthar in meng 4 aa hlatnak ah a ummi khua a si. Credit: The Chinland Post

Thawngpang dang: Moreh Khua Ah Assam Rifle Nih Myanmar Rammi Pa Cu Hriamnam He A Inn Ah An Tlaih!India-Myanmar ramri Manipur ramkulh, Moreh khua Kanan sang ummi Myanmar rammi pakhat cu, August 19 zanṭim ah Assam Rifle le ramkulh palik nih a inn ah an luhhnawh i, pistol zung hnih he an tlaih, tiah Assam Rifle nih cathanh an chuah. Tlaih a tongmi Myanmar rammi pa cu Imphal khua lei ah an kuat. Anih hi nikum ah Moreh khua chung ah meithal le kutcheh bomb he an rak tlaih bal cangmi a si, tiah theih a si.