Mizo Le Naka Hi Chin Miphun An Si Ve Maw? Mizo le Naka hi, Chin miphun bak an si ve ko, asinain Chin miphun a si ve ko mi ah cun, a bik in India ram chung i a um mi hna Mizo le Naka hi, CHIN aa ti ve duh bak lo mi an si, anmah kan hal hna zongah kannih cu Chin kan si ve lo.

Mizo, Naka kan si an ti bak ko, anmah nih cu bantuk in kannih cu Chin kan si ve lo an ti ko ah cun, cu bantuk i an ti ko bu i, Chin nan si ve ko ti in, Chin miphun chungah telh ve ṭualmal le khumh ve ṭualmal awk zong an ṭha lo i, telh ve ṭualmal le khumh ve ṭualmal phung zong a si fawn lo, anmah duhthimnak te ah khan an um ding le an kal ding a si ko ti hi, kei ka ruah ning cu a si,

A ruang cu, India ramchung i a um mi hna Mizo le Naka cu, Chinram an rak chuahtaknak a sautuk cang ruangah Chin miphun a rak si hmasa mi an si nak kha an philh dih cang i, miphun dangah an i ruat cang, cu miphun dang i an i ruah nak cu, a tu an miphun min i an hman mi Mizo timi le Naka timi ah hin an thinlung le an ruahnak 100%100 bak in an tuh fek cang, cu a si caah cun kannih cu Chin miphun kan si ve lo an ti ko buin cun, Chin miphun chungah hin telh ve ṭualmal lo le khumh ve ṭualmal lo hi a ṭha ko lo maw tiah ka ruah,

Atu i kan unau Pa, Thawm Lian Thang zong hi, a Pa Naka, a Nu Tedim/Zomi a si ti a si i, Myanmar ram chungah khoika State le khoika Khua i a um mi dah a si ti zong keinih cun fiang tein ka thei ve lo, Chin ka si ve aa ti nak le Chin a si ve ti thawng kan theih hi cu, Myanmar Idol Top-10 a tlin ve hnu lawngah a si, Top-10 a tlin ve hlan ah cun Chin a si ve le si ve lo zong kan thei bal lo, hi hi ruah ding tampi a um kho mi a si,

Cun, Chin ka si aa ti ve tak tak ah cun Myanmar Idol i a min a rak i pek liau ah hin zei ruangah dah a min zong hi, Chin min in a rak i pek ve lo i, zei ruangah dah Chin miphun min in a rak i pek ve lo ti mi zong hi, ruah ding tampi a um kho fawn, cu bantuk cu thil si ning le kal ning a si ruangah kan unau Pa, Thawm Lian Thang hi, keinih cun 100%100 Chin miphun ah ka pom kho ve lo i, 50%100 lawng hi Chin miphun ah ka pom khawh ve ti hi ka chim duh mi a si,

100%100 Chin miphun ah ka pom mi hna le Chin miphun Original bak a si fawn mi hna cu, kan unau hna pathum-Esther, Benjamin, Yaw Key-hi hna pathum lawng hi an si. Cun, Ram dangah a um mi hna nih Chin miphun kan si ve aa ti mi hna cu, Bangladesh ram chung i a um mi -BAWM aa ti mi hna khi an si, BAWM nih khin Chin miphun kan si ve an ti. Thangtea Hnialum