Minung Maw Party Dah? “A minung zoh hlah uh a party zoh u”. Hi hi 2015 election ah NLD nih an aupi ngaimi si. Cu tik ah NLD tilawng aa citmi poah cu thimnak ah kawltung an phan dih. Cozah an vun ser, MP tam deuh cu rian an cawnnak ah caan a dih. Hluttaw an term cu internship bantuk in an dih ter. ASSK zong a lung dong ngai. A minung pawl an eihmuar, an fel lo tik ah phuah ahcun phuah dih ding phun in an um, zei maw zat cu phuah loin an dinh ter.

2020 ahcun A minung zong zoh a party zong zoh ti kha a hau cang. Zei party dah kan zoh lai ti cun minung smart le quality tha a ngeimi party kha kan zoh awk si tiah ka ruah. NLD theng nih hin Zion hla a kan sak pi lai lo i USDP zong hi Babylon ah a kan hruaitu an si hlei ve lo. Chin Party zong nih miphun luatnak thantar a kan phun piak kho hlei lai lo, hriamnam ah an hmanmi minung an that lo poah cun.

Cu caah minung a fitmi le zapi zaran dotla simi a ngeimi party kha tanh ko usih. Minung nih party policy an thlen khawh an remh khawh. Plastic thawl in kan rawn zong a thawmi mitsur hang cu a thaw thiam ko. Lungvar cu zeibantuk in kan tuam zong ah lungvar si ko lai. Minung tha mi nih policy tha an chuahpi khawh. 2020 ahcun a minung zong zoh a party zong zoh a hau.Caṭialtu: Salai Lian Thawng Hnin