Min Aung Hliang Nih A Sualnak Midang A Puh Hna.

Myanmar News

General Min Aung Hliang Nih A Sualnak Midang A Puh Hna. Kahdohnak lei le Sipuazi lei ah harnak a phunphun a tong mi ralkap hruaitu Min Aung Hlaing nih a palhnak cung ah tuanvo la duh lo in midang sual a phawt hna. Atutan Myanmar ram buainak kong ah mi tampi kha sual a phawt hna.

Ramdang in Drone a thiam mi pawl, NUG cozah kuttang riantuan mi pawl le mipi sawhsawh kha sual phawtnak cazin chung ah a telh hna. Myanmar mipi hna nih lungtak in rian an tuan lo caah a si tiah a chim. Myanmar ram ah kokek vawlei tang chuak hmansung thilri tampi a chuak i khuacaan a tha tuk ko nain mipi hna rian an i zuam lo caah sipuazi lei hnu kan pil tiah a chim.

Sual a puh mi hna cazin chung ah a thar aa tel mi cu 2011 in 2016 tiang cozah a tlai mi U Thein Sein a si. President hlun U Thein Sein hi Myanmar ram sipuazi a tlaknak ah tuanvo ngeitu bik a si Min Aung Hliang nih a chim. Muicawl – The Irrawaddy Burmese-The Chinland Post

Thawngpang dang: Kalaymyo le Chin ramkulh chaklei pehtlaihnak lam a si mi Kalay-Taingen lam a pih caah Falam peng Valung khua pawng ah thilphor mawṭaw le minung phor mawṭaw 100 hrawng cu zarh 2 leng an tap cang tiah theih a si. Kalaymyo in Chin ramkulh chaklei Tedim-Falam-Hakha lei kalnak lam cu November 27 thawk in CDF CDM-Siyin nih himnak ruah ah umkalnak nawl an phih chung hi a si i Falam-Hakha lei in Kalay lei a ṭum mi thilphor mawṭaw le minung phor mawṭaw 100 hrawng cu Falam peng, Valung, New Sumpi khua le Tedim peng Zawngkung khua hna ah an tap tiah khuami hna sin in thawng theih a si.

Laitlang in Kalaymyo lei a ṭum ding mawṭaw pawl an tapnak hi zarh 2 leng a rauh cang caah mawṭaw mawngtu pawl zong eidin an har cang caah khuami nih an cawm hna tiah theih a si. Mawṭaw lam a pih caah a tap mi khualtlawng mipi pawl cu an chungkhar nih cycle in an rak lak hna i an inn lei ah an kir ṭhan tiah theih a si.

Kalay-Taigen lam cu December 9 thawk in umkalnak nawl kan awnh cang tiah CDF CDM Siyin nih an rak thanh nain ralkap pawl nih mipi thuam in a thli tein umkalnak an tuah caah December 10 thawk in an phih ṭhan hi a si.

Cubantuk in lam a pih caah Chin ramkulh chaklei hmunhma ah nifatin eidin le datsi/diesel pawl a dih thluahmah tiah theih a si.

Leave a Reply