𝗠𝗶𝗻 𝗔𝘂𝗻𝗴 𝗛𝗹𝗮𝗶𝗻𝗴 𝗻𝗶𝗵 𝘂𝗸𝗻𝗮𝗸 𝗮 𝗸𝗮𝗻 𝗰𝗵𝘂𝗵𝗺𝗶 𝗵𝗶 𝗮 𝘁𝗵𝗮 𝘁𝘂𝗸. February 1. deilei sml. 2 ah ralkap nih uknak an lak tiah phone an vun ka chawnh le mah ti cun ramchung sahlawh pawl chawnh in khua ka rak dei. Lung dai le khuaruah har lo tein ka um. Atu a ni sarihnak kan vun phan le ramchung ramleng Kawlrammi hna cawlcanghnak ka hmuh, a bikin ram chungmi cawlcangh ning le a buaining ka zoh tikah Min Aung Hlaing le ralkap nih uknak an lakmi hi a ṭha tuk tiah ruahmi tihin ka chim.

Kan ram poliṭik tuanbia kan zoh tikah ralkap nih uknak an lak lengmang. 2008 phunghram zong ah uknak lak khawhnak a lam an i onh cia, asiloah nawlngeihnak a za in an i pe cia. Cu phunghram cu 2010 rampi Democracy phung in i thimnak timi ah tel a duhmi paoh nih an lungtlin i mah cu phunghram ning in asiloah cucu kan cohlan tiah biakamnak tuah a si. Cu biakamnak ning in cun mipi thimmi party zeitluk an ṭhawn zong ah phunghram remh khawhnak nawl a um lo. Ralkap nih Hluttaw ah 100 ah 25 an i ngeih le 75 cung an lonh lawng ah phunghram hi remh khawh ding a si. Cuti a si caah phunghram remh ding in mipi lemsawi cu lih a rak si, mipi hlen a rak si. Zei party hmanh nih an ti kho lo, an i zuam nain an tawng kho lo. Zei ca tiah cun phunghram tlaih in pei bia an rak i kam cu, kan zulh lai tiah. Ralkap sermi phunghram cu pei an rak cohlan cu ti.

NCA timi rampi huap hriamtlai hna he kahdaihnak le biaruahnak lawng hi a lam si cang tiah cuka i ai telmi hna nih an vun chim ve i ruahchannak a umbik ah a rak cang. Asinain mipi thimmi cozah nawl a ngei tuk, mah hi NCA in phunghram pi remh/thar ṭial nakin Hluttaw in tuah khawh hi an rak duhdeuh. Cucaah hriamtlai phu cheukhat cu nan miphun ning ai nan awh kho lo, an in duh dih hna lo tibantuk tiang an tong.

Mipi thimmi hluttaw le cozah cu ralkap bantuk an si lo caah NCA ah an nawlngeih ning le NCA biaruah tik i an kalpi ning kha ai dang ding a si. Cucu miphun ngan le party ngan hna kalpi duhmi pawlasi asiloah Strategy a si tiah ka ruah. Mah ti a si caah NCA hi 2020 election dih hin cun hriamtlai pawl an i ruahning a si lo kho men (Uknak chuh um hlah sehlaw). Theih lo cun a fawideuh kho men, nain 2015-2020 NCA biaruahnak ah tam ngai mipi thimmi cozah lungput a rak lang.

Hluttaw in zei party ngan le mi lianngan zong nih an thlen khawh ti ding a si fawn lo. NCA in thlen hi cu a hnubik i thim ding ah an chiahmi a si (kho men). Cu tikah zeitindah hmailei kan kal rih lai? Cozah thar nih cun phunghrampi a pemnak kua kawl in heh zuam an i tim rih ko lai. Asinain a si kho lai lo. Ralkap leiin USDP maw, an hman khawhmi rammi cheukhat buaibai, biaknak le miphun hmang in cozah le ram buaiter peng kha ai pehzul ko lai. Hi hlei ai thleng lai lo.

𝘾𝙪𝙘𝙖𝙖𝙝 𝙩𝙪𝙩𝙖𝙣 𝙞 𝙈𝙞𝙣 𝘼𝙪𝙣𝙜 𝙃𝙡𝙖𝙞𝙣𝙜 𝙣𝙞𝙝 𝙪𝙠𝙣𝙖𝙠 𝙖 𝙡𝙖𝙠𝙢𝙞 𝙝𝙞 𝙖 𝙩𝙝𝙖 𝙩𝙪𝙠. Russia president Vladimir Putin nih Mihrut lawng nih nuclear ral cu a thawhter khawh lai. tiah kumtin a tuahmi media hna he tonnak ah thawnglatu nih halmi cu a rak leh. Cucu bia ngaite a si. Nuclear bomb an puah ahcun a chungkhat, a chungkhar le amah zong an thi ding a si i mah le mah i nawn ding a si. Hodah a tuah tawn, mah le mah i nawn cu? Mipi chung chuak poliṭikal party nganngan nih kan remh lai an timi phunghrampi hi Min Aung Hlaing kut ah a um. Hi pa nih a tlaihmi tawh hi Election in kan chut kho lai lo. Hluttaw le NCA zong in kan chut kho lai lo. Kan chuh khawhnak ding a lam pakhat lawnglawng a um. Cucu a hruh i a molh lawng hi a si lai.

[Atu hi a caan a si. Min Aung Hlaing hruh caan a si. A min hi MAH tiah an vun ṭial tikah Pathian sin i a rak ummi Lusifar nih “keiMAH” ai ti caah a rak loh bantuk in minung le Pathian he kan i ṭhennak zong cu Keimah ai timi Pathian tluk si duhnak in Thei kan rak ei caah a si. Mah hi cu ka van pial ta bia, keiMAH hi Pathian hmai ahcun hruh a si. Molh a si.] Poliṭik experts le Kawlram cuantu vialte keimah te hmanh nih A cu tluk MAH hruh khawh cu. kan vun ti rai lio chinchap kum zabu 21, IT chan hna i hriamnam in uknak lak cu a molh ko hih kan ti.

Thingthei ṭha a tlai khawh nakding ah kan duh lo le kan ei lomi a thei kha a thut le a thih ta a hau. Democracy phungning in thimmi Hluttaw doh in Rammi nih au le buai awk a ṭha lo. Kan remh kho fawn lo. Kanmah duhduh in kan that kho ti lo. Cu lio i rammi nih hrawh le thah hau lo tein MAH nih a vun hrawhmi hi a ṭha tuk kan ti lengmangmi cu a si. Atu hi caan ṭhabik a si. Poliṭikal party le ramrian ṭuantu hna nih MAH he an i chawnh tikah an hnu le hmai i a dirmi rammi hmang in an duhmi thlennak an hal khawh lai. Sungh ding an ngei ti lo. Kan ngei ti lo. Zeibantuk indah MAH le a naule nih rammi sinah chaw an i leh lai timi lawnglawng a um cang.

Myanmar mipi hna nih kum hra chungte an vun tehmi zalonnak le democracy an lemh hlan an or a phak ah atu bantuk in MAH nih a kan chuh ṭhan tikah a thawt a thei cangmi mipi kan hrangdeuh cang, kan i hrim manh cang, zeitindah ralkap kan doh lai ti kan thiamdeuh cang lawng si loin vawleicung ah kanmah bantuk in uktu a thlengmi Arab-spring te hna. Algeria ramhun Ghadafi Iraq Sadam te hna le Thailand, a hnubik ah Hong Kong te buainak hmang in vawleipi nih Kawlram zong cu hlan nak a letin a vun cuanh cang. Ramkip ah mah phun ram ṭanhnak zong a karh fawn. Miphun tambik i fonhnak Myanmar caah a biapi tukmi ri kan phan ti kan i fian cio hna chan a si fawn.

Vawleicung ram ṭhawng pawl an hmuhning tampi a vun i thleng ve cang i UN zong ah Russia le Tuluk an awaan ai dang. ASEAN a holh tawn lo nain tutan ah Indonesia ai thlak cang. Asia ah poliṭik tuah a duhdeuhmi US president a hun chuah caan te zong a si fawn. Rammi kan lung ai rual ahcun bawmh ding an i redi. Ralkap nih zei ngai an tuah kho ti lo. MAH nih uknak a kan chuhmi hi a ṭha tuk, caan ṭha a si. Hriamtlai phu tlangmi si hna seh, mipi chung chuak party hna nih zeitindah MAH he chaw an i leh lai, zeidah rammi nih teh kan duh set timi ah tampi ai hngat cang. Ram ai thleng hrimhrim cang. Ralkap uknak cu a lo hrimhrim cang lai.

Ramchung mi tluk tein ram lengmi kan lung a fak kan thin a hung. Kan si khawh ning cio in kan rak in dirpi hna. Ngol hna hlah usih. ATU a si lo ahcun ZEITIK HMANH “It’s NOW OR NEVER”. Chinmi Pathian sinah thla kan camdeuh a hau, timhtuahnak ṭha kan ngeih a herh. Bawipa nih thluachuah kan pe ko seh. Cattialtu: Si Bawimang Lian