Myanmar ram kongah UN palai (United Nations Special Envoy on Myanmar) a simi Noeleen Heyzer le rampi ruahnak petu Daw Aungsan Suh Kyi cu caanrem a um in tonnak kan pek hna lai tiah SAC hruaitu Min Aung Hlaing nih a chim tiah AP News nih a ṭial.

Cu lawng si loin Suh Kyi cu a ngandamnak le siarem tein a um khawh nakhnga ṭha tein kan zohkhenh lai tiah SAC hruaitu Min Aung Hlaing nih UN palai Noeleen Heyzer he an i ton lioah a chim fawn. SAC hruaitu le UN palai tonnak ah thihdan pekmi ngol ding, Suh Kyi he tonnak nawl pek ding, Suh Kyi cu amah a inn te ah umter ding, ngakchia tlaihmi hna thlah ṭhan ding le Australia rammi Sean Turnell thlah ding kong an i ceih tiah theih a si.

UN palai le SAC hruaitu tonnak cu dohthlennak tuahtu lei nih biatak tein an soisel. Ramkhel thiamsang cheukhat zong nih hi tonnak hi SAC Cozah cohlan bantuk a si tiah an chim ve. Asinain Noeleen Heyzer le Min Aung Hlaing an i ton lecangka in SAC chimnak nawlngeitu ralbawi Zaw Min Tun nih UN palai nih an kan tonmi cu an kan cohlan caah a si tiah thawng fianternak ah a chim. Asinain UN nih cun SAC kan tonmi hna cu anmah kan cohlan hna si loin minung hawi zawnruahnak in a si tiah an thanh.

Burma Campaign for UK nih cun UN palai Noeleen Heyzer cu a rian in dinhter awktlak a si tiah August 18 ah cathanh an chuah ve. Tutan UN palai khualtlawnnak nih elhniarnak lawng a chuahter i zeihmanh ṭhathnemnak a um kho lai lo tiah Burma Campaign for UK nih an cathanh ah an langhter.

UN palai Noeleen Heyzer cu August 16 ah Myanmar a phan i SAC hruaitu Min Aung Hlaing le ramleng vuanci Wunna Maung Lwin he tonnak an ngei i August 18 ah a kir ṭhan. SAC hruaitu nih bia a kamh bantukin Suh Kyi he tonnak nawl an pek tikah Noeleen Heyzer cu Myanmar ah a rak tlawng ṭhan te lai AP News nih cun a ṭial. Credit: The Chin Post