Min Aung Hlaing chungkhar ramleng chuahnak kong thawngpang a leng: Kawlram chung thawngpang lengmi kong theih tikah Min Aung Hlaing cu thinphang in a nupi le a fanu hna chungkhar cu Russia ah a zamter hna i, a fapa chungkhar hna cu Thailand ah zam dingin timhlamhnak an ngei timi cu theih a si.

A fapa chungkhar hna hi Thailand ah an zamnak a ruang cu a pa bawmh a hrh sual ahcun fawi tein bawmh khawh dingin lam nai deuh ah a zamnak a si tiah theih a si. Hi kawng ah thawngpang a lengmi cu mi tampi nih a dik an ti lio ah cheukhat nih cun a dik lomi puhnak a si tiah an chim ve.

Cun, hi ti bantukin a chungkhar pawl ven himnak pek a duh ruangah le ramleng ah chuahter a timh hna ruangah social media ah langlo dingin Facebook cu zarhkhat chung kham le phihnak tiang a tuahnak a si tiah mi tampi nih cun an zumhnak a si.

Relchih: Kan ram nih thil chiahru tuk a ton lio si caah daih ko awk a ttha lo. Tutan ah Kawl ralkap nih phunghram pi kan ven an tinak ah phunghram pi an buar, thil ttha kan kawl an tinak ah thil ttha lo taktak an tuah:

1. Kawl ralkap lutlai pawl le ralkap ai awhtu vice president nih anmah nawl tein Kaalung meeting an auh i Vice president Myint Shwe cu rampi president ah an hun ser ta phot. Cu hnu ahcun, anmah serchommi president nihcun rampi uknak cu ralkap kut nih a pek hna. Cucu Kawlram phunghram pi a zei kaam zawn hmanh ah a um lomi a si. (A phaw hmanh ah aa ttial lo).

Vice president nih president a dam ko lio i cu bantuk tuah cu hramhram in phunghram buar a si. Cucaah micheu khat nih tutan Kawlram uknak a laatu hi Ralkap siloin Vice president Myint Shwe a si, ti tiang an ti phah. Phunghram ning tein Mee kong thil diklo kan phisin lai tuah ralkap nih an ti lenmi cu hrawkhrol a si; fakpi in phunghram an buar.

2. 2020 rampi thimnak ah Mee dik lomi a tam caah felfai tein hlathlainak tuah kan duh ruangah uknak kan lakmi a si, tiah Kawl ralkap nih an ti. Nain atu ah tuah an timhmi cu “a thar in thimnak tuah tthan ding” ti a si hui. Rampi nih ttha tein vote a thlak cangmi phichuak kha direct in kan hlonh kan cohlang bak lo, kan reject tinak khi a si cang.

Cucaah ralkap nih an kaa in an rak i chimtermi {Mee ningcang lomi a um le um lo zohfelnak} le an tuah timh taktakmi {thimnak result reject} cu tam tuk in aa dangmi a si. An bia le an tuahsernak aa khat lo, zumh awk an tlak lo, rak timi peng a hman zia an langhter tthan cang tinak a si ko. Cucaah hi thil hi ruah chommi siloin timh ciammam tein ralkap nih an tuahmi a si caah, atu i kan tuah lai an timi thimnak thar zong cu an tuah taktak lai zumh a um kho ti lo.

An va tuah hmanh ah 2008 phunghram referendum an rak tuah lio i Fax mui hmang hmuh bal lonak ram ah, Fax in an rak tuah bantuk phungsan khan a phichuak fiang cia phungphai in dah an hei tuah te lo ah??Minung ruahnak in beidong ngaingai a si ko; ruahchannak a tlawm ngaingai! A karlak ah, fakpi in zumtu nih thla tu cam ko rih hna u sihlaw uknak chiahru cu a kan hrawh piaknak hnga hal ko rih hna u sih. Hrambik Lian