A Ruh Tum Hlah, A Hang Na Hap Lai: Tuni Chinram cozah nih Hakha pawngkam thlam tete(innhmun hamnak caah sakmi) an hrawhmi zoh tikah lung cu a tha lo, a ingtuarmi cheukhat cu zangfak an um ngai ko. Kan Hakha thancho nak caah cang hram ko seh.

A taktak ti ahcun tuni an hrawhmi thlam dihlak khi cozah nih hmun samh an timh i lam an cawh dih le cangka in an sakmi lawngte an si. Lam cawh hlan ah sak ciami pakhat hmanh an hrawh lo. Theih a herhmi cu inn sak tikah cozah nawlpeknak lak hmasa a herh, mah hi cu aho poah theih dih a si. Cozah nawlpeknak um loin tlangram ah inn sak cu fir phun khat a si. Tuni an hrawhmi dihlak khi cozah nawlpeknak um loin a thli tein an sakmi lawngte an si.

Hakkau hna lungput taktak cu ‘democracy kan ngah cang, kan zalawng cang, NLD cozah tham cu inn kan sak lai i kan tlerh lai, lam hna kan zawh lai i a kan theh piak taktak ngam lai lo, vawlei kan fir i kan thabatman cu kan hmuh hrimhrim ko lai, MP hlun Za Tlem zong vawlei a ngei ve ko caah a party phu le an puppet media pawl kan forh hna lai i an kan dirhkamh ko lai’ timi hi a si. Tuni lawng ah an ruahnak a palh zia an i fiang.

Midang lungfahter cu ahohmah kan duhmi a si lo, nain phung ning loin thil a tuahtu cu dantat a haumi a si. Hi ruang ah a kan tawlreltu cozah le upadi kan herhnak a si. Credit: Salai Lungthli Tum

A tang ca hi rel chih. Vuanthok bawi U Soe Lwin: Chinram ah pupa ram timi a um bak lo. Chinram chung ah upadi nih a theihpimi pupa ram or pupa vawlei timi hi a um hrimhrim lomi a si tiah Falam Vuanthok bawi U Soe Lwin nih a chim. Atu lio a nungmi upadi ning ah cun 1889 hlan ah an rak tuah cangmi vawlei lawng kha pupa vawlei a si tiah theihpi an si, nain Myanmar ram independence a ngah hnu cun Myanmar ram chung vawlei vialte kha cozah kut ah chiah dih a si tiah a chim.

2008 Constitution poahmah 37 zong ah ‘Myanmar ram chung vawlei cung siseh, vawlei tang siseh, thli lak ah a ummi thilri tiang hi cozah thilri a si’ tiah fiang tein ai tial, pupa ram timi a um hrim lo tiah U Soe Lwin nih a chim.

Khuate ramri khiahpiak an sinak aruang cu thil pakhat khat a can tik ah fawi tein tawlrel khawhnak ding caah khua khat le khua khat ramri khiah a si, nanmah nan ngeihmi ram a si tiah theihpinak a si lo tiin a chim chih.Falam khua ah khuanu khuapa tonpumhnak an ngei i cuka ah cun khuami pakhat nih pupa vawlei kong ah biahalnak a tuah i U Soe Lwin nih a cung lei bantuk in leh hi a si. Chinland Today