Coronavirus le coronavirus nih a chuah pimi harnak kong ah Microsoft founder le billionarie philanthropist Bill Gates nih US President Trump chimmi cu faakpi in a al. Tu zing cacawn nithumni ah Bill Gates nih Twitter ah a chimmi cu President Trump nih World Health Organization bawmhnak phih ding in a timi hi ttih a nungmi a si. A tu lio caan hi WHO nih bawmhnak an herh bik lio caah a si. United States hi a tu tiang ah cun WHO ah phaisa a thawh tam bikmi an si. Cun a tu caan hi United Nations’ Health Agency nih cu hlan vialte nak in bawmh an herh bik lio caan a si, tiah Gates nih a chim.

Vawleicung ngandamnak caanhar chung i kan um lio ah World Health Organization i phaisa thawhmi ngol/phih ding timi cu ttih a nungmi thil a si tiah Gates nih Tweeter ah a langhter. An tuahmi cu hi COVID-19 a karhlo nak hnga ding caah a si i cu an ttuanmi rian cu ngol a si ah cun zei bamtuk mibu organization hmanh nih an ai an rawl kho hlei hna lai lo tiah a chim chih.

President Trump nih nizan cacawn nihnihni ah khan US nih World Health Organization (WHO) ah bawmhnak an peek tawnmi cu phih ding in a thanh. Trump nih a chimmi cu WHO pawl nih coronavirus dohnak ah hin ningcang in rian an ttuan lo. A bik in China ram luhchuahnak kong ah a si. Hi organization hi kan tuahmi a kan dohtu bak an si tiah cacawn nihnihni i biachimnak a ngeih lio ah a chim. President nih a chimmi cu, vawleicung ngandamnak lei rian ttuantu dang hna he chawnhbiaknak cu kan ngei ko lai tiah a chim chih.

WHO pawl nih hin January thla canceo ah khan China in novel coronavirus hi ai thok tiah ralrin peeknak thawng an thanh. January ni 30 ah global health emergency an thanh. Cun March 11 ah Antarctica continent dah tilo cu vawleicung ram kip ah zawtnak a phan cang tiah an thanh. Ref: ABC News