Lionel Messi: Cristiano Ronaldo he kan karlak zuamcawhnak hi cu lentecelhnak tualchung lawng ah a si. Lenglei ah cun kan karlak pehtlaihnak a tthatuk tiah a chim.

Cacawn nikhatni i Milan khuapi ah tuah mi Best FIFA Men’s Player award peknak ah Ronaldo le Van Dijk hna cu lonh in Lionel Messi nih laksawng cu a co. Ballon d’Or voinga ve ve a dong cang mi Messi le Ronaldo kong karlak zong atu tiang ah chim ceih a dong kho lomi a si. Hi kongah amah Lionel Messi zong an nih an pahnih karlak cu a tanglei bantukin fiang ko in a chim ve.

Barcelona captain Messi nih a timi cu Cristiano Ronaldo he a dawmi le a ngamhtlak ngaingai mi kan si ko. Cun, a kan karlak ah zuamcawhnak zong a um taktak. A ruang cu pakhat Barcelona ah a um i, pakhat Real Madrid ah a um ruang ah si. Cu zuamcawhnak zong cu lentecelhnak tualchung lawng ah a si fawn,”tiah a chim.

Mi tampi ruahnak ahcun lenglei zongah aa zuamcawh ding mi ah an kan ruah, lentecelhnak tualchung ahcun a caan caan ah a um ding hrim a si ko, a ruang cu kan team ttha bik seh ti kan duh ve ve i, sungh kan duh ve ve lo. Sinain lenglei ahcun kan pahnih karlak ah cu bantuk ruahnak ttha lo a um lo i, ngamhtlak ngai le daw ngaiin kan um an hmuh tikah ttenkhat cu an khuaruahhar tawn,”tiah a chim fawn.

A chim rih mi cu kan pahnih karlak zuamcawhnak hi um peng ko hmanhsehlaw lentecelhnak tual leng ahcun a um lo. Mah hi a biapi taktak mi cu a si,”tiin a chim chih.