Matupi Peng Ah Ralhrang Nih Vanlawng In Kahdohnak An Tuah Ruang Ah Tualchung Mi 4 Nunnak Liam.

Chin News

Matupi Peng Ah SAC Ralkap Nih Vanlawng In Kahdohnak An Tuah Ruang Ah Tualchung Mi 4 Nunnak Liam. Chin ramkulh, Matupi peng ah SAC ralkap nih nizan December 18 ah vanlawng in  kahdohnak an tuah ruang ah nu pakhat telh in tualchung mi 4 an nunnak a liam i hliam a tuarmi zong an um, tiah theih a si.

Matupi-Paletwa lam cung um SAC ralkap Theaboi sakhan cu nizan December 18 ah Chin hriamtlai phu nih an kah i SAC ralkap lei aa hliammi an tam caah zanlei suimilam 2:00 hrawng ah SAC ralkap nih vanlawng in kahdohnak an tuah, tiah theih a si.

SAC ralkap nih vanlawng in kahdohnak an tuah ruang ah Vankai khuami nu 1 telh in tualchung mi 4 an nunnak a liam i minung 1 hliamhma fak ngai a tuarnak kong cu Matupi peng mizapi ukhruainak phu in ṭuanvo ngeitu Salai Pa Thawng nih a chim.

SAC ralkap nih vanlawng in bomb voi thum an thlak, Theaboi ah voikhat, Lesin ah voikhat, Vankai ah voikhat tiin voi thum a thlak i hmunril in 2 an nunnak a liam. Hliamhma pumi 3 chung ah 2 an nunnak a liam ṭhan i an dihlak in Vankai khuami an sinak zong a chim chap.

Theaboi khuami hna cu kahdohnak a chuah hlan in ral an zaam cang i hliam a tuarmi an um lo. Lesin khua cacawnnak sianginn pawng zong ah bomb a tla i a puak, tiah theih a si.

A luancia November 15 lio zong ah SAC ralkap nih raltuknak vanlawng pahnih in Matupi peng Vuilu khua ah bomb an rak thlak i ngakchia 8, CDF sianginn cachim 1 telh in minung 11 an nunnak a rak liam. Ref: The Chin Post

Leave a Reply