Manny Pacquiao He I Thongh (Rematch) Tthan Ka Duh Tiah Keith Thurman Nih A Co Tthan Ko

Mipi nih zoh lai kan i ngaih taktak mi boxing cu tuzing ah MGM Grand Garden Arena, USA ah Manny Pacquiao le a sung bal rih lomi Keith Thurman cu thong i, Pacquiao nih Keith Thurman cu a tei caah WBA Super Welterweight Champion a si pin ah boxing record ah a sung bal rih lomi Keith Thurman a tei hmasa tu zong a si.

Kan theih bantukin boxer pahnih hna i an i thongh hlan hrimhrim in an konglam nih vawlei pi tiang a hnih tikah boruak a sang taktak. Cu lawng si loin an i thongh hlan in Thurman nih Pacquiao a tei lainak ding kong a chim pinah zohchia ngaiin ka chiah lai,”tiah a chim len. Sinain kum 40 si cang mi Pacquiao tu nih zohchia ngai tu in a tei ai.

Kan hmuh bantukin round 1 nak an i thongh bak ah Pacquiao nih Thurman cu tlu lakin a phomh colh. Cuah cun mipi cu a tur bakin an tur ko hna. Round 1-in round 4 tiangah Pacquiao nih hma a hun hruai i, round 5-in round 7 tu hi Thurman nih hma a hruai ve. A dongh lei ahcun round khatnak i Pacquiao nih tlu lakin a thongh mi ruangah Thurman cu a hnar in thisen a chuah peng caah a duh ning in a cawl kho ti lo.

Round dih lei a panh deuh Pacquiao cawlcangh ning a ttha chin lengmang i, Thurman nih zeitluk aa zuam len zongah a cawlcangh le mi thongh a rangtuk mi Pacquiao sin in aa veng kho ti lo. Caan a hun dih i, judge pathum chungah pahnih nih Pacquiao teinak an pek i, a dang pakhat nih Thurman teinak a pek ve. Cucaah split decision hmangin Pacquiao nih Welterweight fighter Thurman lakah teinak a hmuh.

Caan dih hnu ah Pacquiao nih Thurman konglam chim in, fighter ttha taktak pakhat a si pinah hlan te in fawi ngai in tei khawh ding a si lai timi ka rak zumh cio mi a si,”tiah a chim. Hi kong he pehtlaiin Keit Thurman tu nih a timi cu Pacquiao he i thongh (Rematch) ngaih tthan ka tuah,”tiah mipi thei ah fiang ko in a chim tthan. Cu tikah a bia theitu mipi hna zong nih an i thongh tthan ding hi an doh cio timi hmuh le theih khawh a si.

Kan theih bantuk in Manny Pacquiao atu ah kum 40 chung a hman lio i, amah zong nih kum 45 tiang cu ring cungah ka thong rih ko lai,”tiah a rak chim cang. Cu lawng si loin tukum dih lei ah British Boxer Amir Khan he an i thong tthan lei timi chim a si fawn. Sinain hi kongah Manny Pacquiao leiin zeihmanh chim mi um rih lo.