Pudu Thirhling Kulh (lockdown) cu Tlaihkhihnak Um Lo Tein Aa Lim. Chin ralzaam hawikom dawt vialte hna nan umnak cio ah dam in nan um cio hna lai tiah zumhnak kan nei.

Hopoh nih kan thinphanmi le kan lungretheih ciomi Pudu thirhling kulhnak (lockdown) cu tlaihkhihnak um lo tein May 29, zaan suimilam 9 ah an thirhling cu an hawh ruangmang. A chung ah ummi cu chim lo a leng ummi zong hnangamnak in kan khat cio. Hi Pudu lockdown thirhling kulh cu May 14 zaan in an thok.

Kan Chin miphun minung 300 hrawng cu hi thirhling kulh chungah lungrethei le thinphang in an um. Cheukhat cu zawtnak lunghrinh ruangah cozah nih a tuahmi mizaw thlopbulnak ah an chiah hna (Quarantine an tuah hna). Ni 14 an tlin cun dam tein ran rak chuak than lai tiah zumhnak kan nei. Thlacam bawm rih hna uhsih.

Hi Pudu lockdown (thirhling kulh) chung ummi kan Chin miphun hna caah bawmchantu vialte le thlacampiaktu miphun hawi nan dihlak cung ah kan i lawm. Malaysia kan dirhmun cu a fek kho rih lo caah kan umnak cio ah i ralrin peng kan hau rih. Zawtnak a thiang kho rih lo. June 9 tiang cu CMCO (Conditional Movement Control Order) a si rih. Zapi lengchuah khawh asi rih lo.

Siaherhnak he. CRC Malaysia