Nikum thawk khan ‘a tang lam in Malaysia kalnak puaisa kan tuanti lai, rat a duhmi an tam tuk i a miak tuk, thlakhat ah ting thong in kan ngah lai’ tiah aka sawmmi tampi an um. Zahan nai zong ah pahnih thum nih an ka sawm, nain ‘ka tuan kho ding phun a si lo’ tiah ka al hna.

Upadi tang ah business license he ningcang tein visa kan sawk piak hna hmanh ah anmah duh ning in thil a kal lo caan ah Laimi tam deuh cu ‘Facebook ka post lai, Lai media ah ka phuan lai, palek sin ah kan taing hna lai’ tiin sullam umlo mi tlerh le thangchiat a tam tuk. Biafak a ing kho pah lomi caah cun ngahmi zat le intuarmi zat ai rup lo, lungthin a buaimi a fak deuh tawn.

Upadi tang rian kan tuan lio hmanh ah hitluk complain le tlerh a tam ah upadi he ai kalhmi puaisa cu tuan tuah ninglaw kai thupnak ding hmunhma hmanh a um hnga lo, ek inn ah tlak sual bantuk a si hnga. Ka tih tuk.

Cun, mi tampi lungthin ah puaisa pawl khi zeibantuk retheihnak hmanh um loin phaisa tampi an ngah tiah kan ruah hna, cucu a dikmi a si lo. Tulio puaisa tampi khi zaran nih kan intuar khawh lomi lungretheihnak le thangchiat nak phuntling an ing ve, a fawimi rian a si lo. Hi ruang ah a lungthin a thawng bakmi lawng nih caan sau an tuan khawh khi a si. Credit: Salai Lungthli Tum