Malaysia Ah Kan Kal Awk A si Ti Maw?

Chin News

Editor Hmurka: Malaysia Ah Kan Kal Awk A si Ti Maw? Min Aung Hlaing nih uknak a lak hlan ah khan Malaysia ahhin Chinmi minung 40,000 hrawng an rak um. UNHCR Card a ngeimi hi minung 20,000 fai an rak si. Kum 2013 UN zung lut mi minung 15,000 reng lo UN nih final reject a rak tuah hna i Card loin an um hna. Kum 2013 UN card chuh mi a tu tiang Card pek than a um ti lo. A dam fak taktak mi dah ti lo Card a pe than ti hna lo. Min Aung Hlaing nih uknak a lak hnu kum 2021 hnu bak khan Malaysia ah Chinmi a tomtom in kan kal.  Nihin tiang Chinmi a tomtom in kal peng rih a si ko.

A tu tiang ahhin Malaysia ahhin Chinmi hi a tlawmbik 80,000 hrawng cu an um cang lai. A ting hmanh an phan men lai. A ruang cu Min Aung Hlaing nih uknak a lak hnu ah a kalmi an tam tuk hringhran. Milu hi tha tein community nih rel awk a tha lo. Kan unau Tedim lei hrim zong khi tamtuk Malaysia an phan. A hlan ah Biakinn ah mipi zalong ngai i pumh tawnnak ah khan Khrihfabu / Fellowship tampi an i tlum ti lo i Biakinn lian deuh ah ai thial mi tampi an um hna. Hakha peng khuate pakhat lawng hmanh ah ram buai hnu a phan thar minung 250 reng lo an si.

1. Umnak Inn: Minung tamtuk a si cang caah umnak inn khan hlan ding a har. Cu pinah Chinmi umnak ding caah inn hlan a siang lomi tampi an um. Sikan kan ngeih lo ruang ah a si. 2. Rian

Malaysia rian a har. A bikin holh a thiam lomi le UNHCR card a ngei lomi caah rian a har khun. Cu ruang ah a phanthar mi tampi hi rian loin a ummi tamtuk an um cang. Lungrethei vansang in a ummi tampi an um cang ti a si. Laitlang kir hmanh a duh deuh mi zong tampi an um cang. 3. Thil man a kai tuk

Vawlei pi thil man kai a si ko nain Malaysia hi thilman a kai khun. A hlan ah Facang bag khat ah RM 26 in cawk tawn mi kha RM 40 bak ah a kai cang. Sa man le zeidang thil man zong an kai dih. Cu caah nun khuasak hi a har ngai cang.

4. UNHCR online register

A phan tharmi nih mah le community Card cio i tuah i UN ah online register i tuah a si. Mahhi online register hin UNHCR card ka ngah te lai ti hi ruah ngam a si lo. Register na tuah hnu kum 4/5 hnu ah khin UN nih an in au te hnga maw theih lo a si. Cu hnu ah ramthumnak kalnak ding hei ruah chih khi cu lung a dong ngai. 5. Australia chungkhat auh nak

Australia in chungkhat auhnak zong hi UNHCR card a ngei lomi caah cun a fawi ti lo. Ruahchan awk a um lo tluk khi a si cang. Cu caah Malaysia kal ding le kal lo ding hi pumpak cung ah aa hngat ko nain Malaysia ah a ummi an dirhmun le sining hi fiang tein theih hmasa a hau. Ref: CBN Daily News

Leave a Reply