Malaysia ah Chinpa (Laipa) Gas nih a puah hnawh i fak tuk a hliam nain phaisa a ngeih lo ruangah sizung in an lawi ter

Chin News

Malaysia khuasa Tv. Dal Khan Pum cu a rianṭuannak dawr coka (Kitchen) lei ummi Gas nih a puah hnawh caah a kut, a liang, a hngawng le a hmai a kangh chih dih i a mui hmanh hi ṭha tein hliah khawh asi ti lo. Hihi Jan 7, 2021 suimilam 10:20Am ah a cangmi thil asi.

Shah Alam sizungpi ah an rak kalpi colh nain thlopbulnak phaisa leiah harsatnak an ngeih caah sibawi te le nurse te nih ṭha tein an zohkhenh duh lo. Sizung ah zaan 2 hrawng a riah hnuah tlamtling te hmanh in an thlopbul lo buin siizung in cun an chuahter tiah theih a si.

Kan unau pa hi phaisa lei kap rak chanbau hlah sehlaw rianrang in i thlop colh a haumi khi asi. A hma fah zong a tuar kho ti lo i a pumsa ca zongah ṭihnung ngai thil asi. Lungfak ngai in a ṭah caan hmanh ah a kut in (a mah tein) a mitthli aa hnawt kho lo.

Amah hi a chuahkehnak khua cu Pyidawthar a si i Pu Ngulh Khan Cing le Pi Do Ngin Cing (tleicia) hna i an fapa pakhat asi. Hiti asi caah vanchiat a tongmi Tv. Dal Khan Pum caah a tlawm tam ti loin a tang i langhtermi ahhin pehtlaih le bawmhchanh khawh asi.

Merchantrade: 018-2635184
Name: Kai Sian Pau

CIMB Bank: 700-272-1918
Name: Kai Sian Pau

Hlathlainak ZRC 01123356850/ 0182635184
Source: ZAM (Globalchinmedia)

Breaking News: Tuzing Falam inn kanghnak ah a kal ve mi pakhat telh, minung pathum sin in COVID-19 zawtnak hmuh. 2021 January 12 zing suimilaam 3:00 le 4:00 karlak i Falam khuapi, khuachung lam aa tonnak hmun i inn kanghnak ah a kal i rian a tuan ve mi pa pakhat le minung pahnih dihlak fonh minung pathum sin in COVID-19 zawtnak hmuh a si tiah kan theih.

Hi kong he pehtlai in rian ngei pakhat nih, “Atu zawtnak hmuh thar mi hi an dihlak ah minung pathum an si. An pathum ning in Falam i Tonzaang pa zawtnak hmuh mi pa he Falam Golf (kouh-ti) kun honnak ah Glof an tu ti hna. Zawtnak hmuh mi he Glof an tuk ti hna ca ah amah he aa naihniam mi poh zawtnak kan chek hna i atu minung pathum sin in zawtnak kan hmuh hi a si. An pathum ning in Falam khuachung ah a ummi an si,” tiah a chim.

Chin Ramkulh chung COVID-19 zawtnak a chuah ka 2020 March 23 in nihin tiang ah zawtnak ngei minung 339 an si cang. Atu Falam i zawtnak hmuh mi pathum chung ah pakhat hi Falam Sipin Zung Lutlai pakhat aa tel. Zawtnak hmuh mi minung pathum hna chung ah pakhat hi tuzing inn kanghnak hmun ah a kal ve i rian zong tlawmpal a tuanpi ve hna. Cun, atu hi Sipin zung riantuan zong an dihlak in zawtnak an chek lio hna tiah kan theih.

Myanmar ram chung ah nihin tiang COVID-19 zawtnak ngei dihlak 131,186, zawtnak in a dam than mi minung 114,609 le zawtnak in a thi mi minung 2,858 an si cang tiah 2021 January 11 zaan suimilaam 8:00 ah Ramkomh Ngandamnak Zung nih a thanh. Source: The Hakha Post

US President Trump Ui-ril Zamhnawh: Tulio US buaibainak hi Laiphung mit in zohchih ahcun “uiril zamhnawh” he ai lo. Laiphung ah uiril zamhnawh timi hi a tlangpi phun li in kan hman: (1) Khua chungah cumpi tlangrai siloah zawt-rai phun a tlun tikah, thlacam tiphul tuah hnu ah khua hauka lam vaang chuak in an thah mi ui-ril zawn in zawt-rai thawlnak, (2) khua chung ah mibing nih siseh, rualchan nih siseh, khuami nih siseh, remlo mi, huatmi an ngeih tikah an inn hram ah maw, khua hauka kun ah maw chiatserhnak ui-ril zamhnawh, (3) kokek meiral nih inn le lo a kangh tikah pawngkam inn va tlaihchin le kangh chin hlah seh, tiah ui-ril zamkanh in mei ralvennak, le (4) khuahlum chungkhar chungkhar peem le vah an i timh tikah hmurka in sathi luanh tiang thlauhnak tuah a si ko nain an i thulh duh lo tikah ui-ril zamhnawh ti’n, hlan pipu hna nuntual nun ah rak hman mi phung pakhat a si.

Chiatserh le thawldawinak ca ui-ril zam hi a chiakha ngai mi a si, pah chinchap ahcun ngaihchiatnak nih a zulh an rak ti. Nihin US President dirhmun cuanhpiak tikah, hlan Laiphung ui-ril zamhnawh ka lawhter ngai hna. Cucu kehdak (Democratic) nih nawlnolh in dumdawi (impeachment) tuah timh mi kong hi a si. US phunghram tangah House nih President chuah khawhnak nawl a ngeih ti cu, nan hngalh cio mi a si. Phungning tein President Trump cu 2016 thimnak tuanbia zohchih in an rak dumdawi, sinain hlawh a cham.

White House a luh ni thok in a palhnak le sualnak rumro kawl le zeitin kan tlaih khawh lai ti a bawhtu Democratic nih January 6, 2021, Cozah innpi (Capitol) buaibainak cu caanrem ah hmang in, President nawlngaihnak ni 9 lawng a taang cang mi cu dum an dum an timh nolh. Maivan chung thimnak (poll) an tuahmi ning bang cun, atute (immediate) bak hin a rian in phuah colh u tiah, a ti mi an tam deuh ti si.

Sinain Democratic nih phungning tein dumdawi (impeachment) tuah i cu hnu ah hlawhtlin a si ahcun dum ding timhlamhnak an ngei. An i timhlamh chung ah Trump hi President a sinak nicaan a tling kho mi a si, cu tikah zeidah a cang kho kan ti a si ahcun:
Impeachment an tuah mi hlawh a tlin si cun, President Trump nih US tuanbia ah President cuh khawhnak lam in an phih lai.

US phunghram tang Former President Act (President hlun pawl zulhphung) phung ah a ummi President hlun cu US cozah riantuannak ah ai telmi pakhat a si lai, pension hlawh 1 million a hmuh lai, a nun chung humhimnak caah thlithup ralveng (Secret Service) pek ding tbk., an phihpiak lai. ABC news

A nupi First Lady Melania Trump he an i then lo siloah Trump a thih hnu in va dang a ngeih lo ahcun nun humhimnak (Secret Sevice) ralveng a tinco ding mi le, a fapa Barron Trump nih kum 16 a tlin hlan vialte humhimnak ralveng a tinco ding mi vialte an phihpiak khawh. Sinain Biden kut chungah nawlngeihnak a pek ni January 20 hlan ah dinhnak ca a tial ahcun, phungning tein a hmuh hna lai.

(Congressional Research Service) A cung biapi pathum (main points) ka langhter mi hna Democratic nih President Trump caantling tuan hnu dumdawinak (impeachment) an tuah ding mi cu si. Dumdawi lote in a caan hi donghter hna sehlaw Trump chungkhar ca zong ah thahnem phum hnga, sinain dinhdorh an tim lo. Cucaah phundangpi in kan kuaihpiak hna a si ahcun, Laiphung ui-ril zamhnawh khing khi a si, na cung ah zei paoh va cang seh, kan zei hme a va poi ti khi si.

An hmuitinhning bang in tlawm a tlin ahcun, Trump chungkhar caah a him lo ngaingai, zeitintiah, Iran nih Trump lu a ka phorh kho mi paoh $80 million kan pek hna lai, tiah a rak ti bal. Kha bia kha vawlei theih in a chimmi a si i nihin tiang a let thawng theih a si lo. Hiti tikah Iran nih an thah hrimhrim lai tinak a si lo, US phung nih hmuh hnga ding a ti mi an hmuhter lo ding mi nih a chuahpi ding thil khi chim duh mi a si. Bia donghnak ah, Laiphung ah ui-ril zamhnawh ahcun chuah le dawi, thawl (2 nak zawn) khing khi a si bantukin, tutan Democratic nih Trump cungah an tuahto mi hi ram in an dawi hlah maw ti awk in.

___

Copyright © Chin World News Evening

Leave a Reply