Ngaihchiatnak thawngpang: Tuzing March 6, 2020 zinglei sumilam 5:30 hrawngah Malaysia ah ralzaam dirhmun in a ummi Chinmi minung pahnih cu lampi ah mawṭaw nih a phah hna i a hmun ah an nunnak a liam tiah theih a si.

Mawṭaw nih a pahmi hna Chinmi pahnih hna an min cu Nang Pian Thang le David Kam Lian ti an si i Jalam Loke Yew lampi ah mawṭaw nih a pah hna hi a si. David Kam Lian le Nang Pian Thang hna hi kanmah chin hrimhrim an si tiah Tedim upa lei zong fianternak an tuah. Anmah hi Zomi/ Tedim miphun an si i Malaysia ralzaam dirhmun in a ummi an si.

Vanchiatnak a tongmi David Kam Lian thang hi laitlang lei a chuahkehnak khua cu Chin ramkulh Tedim peng Sakhangyi khuami a si tiah theih a si i Nang Pian Thang zong Tedim ṭhiamṭtthiam a si ve i anih hi laitlang lei a chuahkehnak khua cu Zozang a si tiah theih a si. A poi ngaingaimi pakhat cu Malaysia Laimi a ummi mitampi nih an chimmi cu Malaysia thlan a lawngmi a um ti lo ti a si.

Cun atulio hrawngah Malaysia ah kanmah Laimi mual a liammi an tam ngaingai hna. A tam deuh cu laitlang leiah kuat deuh an si tiah kan theih fawn. Malaysia ah Laimi a lu a phummi kan tam ngaingai cang. Atulio Malaysia cu ralzaam dirhmun in cun a him lo ngaingaimi a si. Tlaihkhihnak a tam tikah i ralrin ngaingai ahau. Atu bantukin Malaysia Chinmi ralzaam nih vanchiatnak kan tonhi cu a ngaih a chia hringhran ko. Nang Pian Thang le David Kam Lian hna an ruak cu sizungah chiah rih a si.