By-James Bawi Thang Bik||Kan hnu Sunday ni ah The Chin Express he interview ka ngei. Mah interview ah cazin ka ngeih ning tein thongtla lio mi milu kong ka chim. Ni zan ah kan ACR Legal In charge (tlaihkhih lei tuanvo la tu) he bia kan nih ruah lio ah a ka chim mi cu thonginn ah Chin mi kan mah lei nih kan petlaih kho lo mi hna tampi an um rih.

Milu 200 reng lo Chin mi thonginn ah an um lai a ka ti. Mah bia nih ka lung a ka kuai ter, ka lungthin chung ah mithli a luang, ka tap ko. Thonginn chung ah zeitluk a harsa ti mi cu a cheu nih cun nan thei cang ko lai. Takvun zawtnak (Skin decease )ti bantuk, covid-19 ti bantuk zawtnak a phunphun in a um. Ramdang mi he a tawmtawm in chia ti an si.

Mah hna ka ruat tik ah Pathian sin ah bia hal nak zong ka tuah. Mah bantuk tuar nak hi chin mi caah zei tik ah a dongh te lai ti bia hal nak ka tuah. Kan mah lei nih ti khawh tawk in kan i zuam ve ko na tein minung kan si ve tik ah tuah kho lo mi thil tampi a um ve tik ah lung a fak ko.

Zei poh si zong ah luatnak a hmu mi nih an caah thla rak cam piak peng ko uh tiah bawm kan hal hna. A cheu cu an luat thannak ding caah ruahchan nak an um ko na tein ruahchan nak a um ti lo mi zong an tampi. An caah Pathian nih luatnak rak pek dih ko hna seh.

Note: Hihi Malaysia ralzaam caah rianṭuantu Alliance of Chin Refugees ah chairman a simi James Bawi Thang Bik nih amah pumpak facebook ah a tarmi chungin kan rak lakchinmi a si. The Chin Express nih Malaysia ralzaam kong he pehtlai in interviews an tuahnak VIDEO zong rak tar chih. VIDEO timi rak hmeh piak law ngaih khawh a si lai.