Kan theih dih cio cang bantukin Malaysia Inn cungin a tlami Mai Sui Hlei Ṭial ruak cu Malaysia kawlram ah tlunpi a si. Yangon tluang tein a phakpi hnuah Thantlang lei panh in an tlunpi i Thantlang an phak ah Thantlang khua luh an sianh hna lo tiah theih a si. Thantlang khua ah luhnak nawl an pek lo hnanak kong he pehtlai in A pu le A pi nih mipi sinah thawngfianhnak an tuah.

Apu Cung Lian nih a chimmi cu,“Sui Hlei Ṭial hi ka tuhnu a si i a nu hi ka far pathumnak a si. Hringtu apa hi Lungler khuami Pu Than Khar a si. Sui Hlei Ṭial hi kum 2013 August thla chungah Malaysia ah a thawhmi a si. Malaysia ah kum 6 a um hnuah atubantukin a ruakin a rak kan tlun hnawh.

“A thihnak a ruang cu inncung in atla tiah thawng an kan thanh. Inncung in atlak hlan ahhin hringtu a nu he phone zongin an ichawn ko. Cun, a naunu zong Malaysia ah a um ve i hmunkhatte ah an um. A naunu zong anu he tlamtling tein an ichawn ve ko.

“Phone an ichawnh hnuah, Sui Hlei Ṭial inncung in atla i a thi tiang thawng kan theih hi a si. Anmah hi Unau pa 4 chuak an si i nu pa 2 pa 2 an si. Cun, a nulepa hi a ṭhenmi an si,” tiah Mai Sui Hlei Ṭial a sining konglam tawi le a thihning a chim.

A pi Pi Dawt Hnem Sung a ruak ṭhialnak kong he pehtlai in an biahal an tikah a chimmi cu, “Kan hal cuahmah lio cu a si i kan iruah piak ko hna a ṭha ko lai, lungṭha te khan rak um ko uh. A ṭhatṭhatnak in kan in tuah piak ko hna lai tiah an kan ti.

“An kan ruahpiak lole a kan tuahpiak lo a si ahcun, Hakha khualipi mino vialte le upa lungfim, khuaruat kho hna nih nan kan zoh sawhsawh hrim lai lo ti ruahchannak kan ngei ko. Kanmah pumpak in cun cawlcangh peng ko i mualpho in Lamkam phum kan si cang.

“Atu uknak lei Thantlang Sizung bawi lei kan hal hna i, aruak hi ṭha tein ṭhial ko uh, fim ko uh, Chun ah mipi theih in fim uh an kan ti lo ahcun Laimi, dawtmi u le nau vialte nih nan kan zoh sawhsawh kho hnga maw? Kan sawhsawh hrim hlah uh, kan bawmhchan ko ulaw ti in hal hna le in nawl hna ka duh ko.

Thantlang Cozah nawlngeitu hna nih zaan a thli tein ṭhial dingin nawl a pek hna timi kongah Pi Dawt Hnem Sung nih hitihin lehnak a tuah hna. A chimmi cu,“Hi tluk in zapi Lamka i an kan vui i mual kan pho dih hnu i zaan i thlithup in ruak va lak i va fim ding hi mifir le damiah bantukin ruak ka lak i fim ding hi, zaanṭim le khuamang i JCB in vawlei an cawh i an kan phumter hleiah cun, mipi le hmuh ah a ruak hi fimtawl kho usih law kan duh. Zaanṭim le khuamang i ruak va lak i ifimtawl ding cu kan duh lo,” Pi Dawt Hnem Sung nih cun a chim.

Video kan chiahmi ah tlamtling tein ngaih khawh a si. An chimmi kan ṭial lomi le kan hrelhmi tete a um khawh caah Video kan taarmi ah tlamtling deuh in ngaih khawh a si. Thantlang Cozah nawlngeitu rianṭuannak kan duh lo, Lai phungning tein kalpi siseh tinak ah Share rak tuah ve!