Hibantuk thawngpang vun theih hi cu lungthin a nuam hrimhrim loh. Kum (28)upa nu pakhat cu damlo ruangah sizung pa 6 bakah admit (i piah)dingin a kal nain an rak cohlan lo ruangah a nunnak a liam tiah theih a si. Aluancia kan hnuzarh cacawn nikhat ahkhan Philiphines ram, Manila khuapi pawngah a ummi Caloocan khua ah a ummi Kathy Bulatao tiah an auhmi nu pakhat cu nau a ngei tiah theih a si. Cu nau angeihmi cu a fa pathumnak a si.

Nau a ngeih ahhin thil diklo poipang a um ruangah sizung ah an tlikpi colh tiah a si. Kathy Bulatao cu nau angeih cang ka in a cat loin a thi chuak tiah an chim i, cuti i a nupi a um tik ah cun a pasal Jan Christian Bulatao nih an inn pawng hrawnghrang ah ummi Palik cheukhat pawl cu bawmh a hal hna tiah theih a si. Cu cang ka cun Kathy cu motor in sizung lei an kalpi colh.

Cuticun suimilam 6 chung Manila khuapi lei panh in an kal hnuah admit (sizung luhternak) nak sizung an kawl colh. Asinain an ruahning bangin thil a kal loh ai. Covid-19 pulrai zawtnak ruangah sizung nih thisen pek ding kan ngei lo (chiahciami kan ngei lo) tiin sizung 6 bakah i admit kho loin a um. Adonghnak sizung pakhat nih an cohlan nain an ram phaisa in 30,000 a dih lai cu zat nan pek khawh ding ahcun admit khawh a si tiah an ra ti ve hna.

 

Asinain Kathy pasal nih cun cu zatzat phaisa an ngeih lonak le sifak rethei harsa an sinak cu chim hna in le zaangfak a nawl len ko hna zongah phaisa lo cun an admit kho hlei lo i cuticun awlokchong ngai cun an um. Cuticun sizung dangdang kawl in hmun dangdang i an ṭhial lengmang tikah a nupi dirhmun cu a hung zual hma ngaingai i Bulacan khua i sizung pakhat ah an vansang hnuah an admit khawh.

Asinain room chung in an hun luhpi tikah cun a nupi cu chawnh lo in a um. Cuticun a Kathy cu a nunnak a liam hi a si. Cu kong cu mi tampi nih Social Media an hmuh tikah an ngaihchia in an tuarpi ngaingai hna i an reitheih sifah ruangah kathy hi a nunnak a liam tiah mitampi nih an chim ve.